АҚШ Британияга ультиматум қўйиши мумкин

Агар Лондон мудофаа харажатларини оширмаса, АҚШ Буюк Британияга Мальвин (Фолкленд) оролларининг кимга тегишлилиги масаласидаги ўз позициясини қайта кўриб чиқиш билан таҳдид қилиши мумкин. Бу ҳақда юқори мартабали америкалик мулозимга таяниб, “Telegraph” газетаси хабар берди.

Нашр маълумотларига кўра, ҳозирда Вашингтон расман бетараф позицияда ва архипелаг суверенитетини Буюк Британия ёки Аргентинага тегишли деб тан олмайди. Шу билан бирга, АҚШ оролларнинг британ томони томонидан амалда бошқарилишини тан олади.

Қайд этилишича, Пентагон НАТО иттифоқчиларини мудофаа харажатларини ошириш бўйича мажбуриятларини бажаришга чақирмоқда.

Газета суҳбатдошининг айтишича, Вашингтон Буюк Британияга АҚШнинг ҳарбий соҳадаги потенциал етакчи ҳамкори сифатида қарайди. Бироқ Лондон томонидан жорий йилнинг июнь ойида эълон қилинган мудофаага инвестицияларни ошириш режаси ҳозирча Америка томонини тўлиқ қониқтирмаяпти.

У ушбу фонда АҚШ Фолкленд ороллари бўйича ўз позициясини қайта кўриб чиқиши мумкинлигини истисно этмаган.

Маълумот учун, Мальвин (Фолкленд) ороллари – Аргентина ва Буюк Британия ўртасидаги баҳсли ҳудуд ҳисобланади. 1982 йилда мамлакатлар ўртасида қуролли низо юз берган ва унда Аргентина мағлубиятга учраган. 2013 йилда ороллар аҳолиси Буюк Британиянинг денгизорти ҳудуди мақомини ёқлаб овоз берган (99,8 фоиз).

Эслатиб ўтамиз, аввалроқ Аргентина Бирлашган Қиролликни Мальвин (Фолкленд) ороллари устидан суверенитет масаласини муҳокама қилишни қайта бошлашга чақирганди.