Аҳмедовнинг мурожаати ортидан “Ўзбекфильм”нинг 1 млрд сўмлик қарзи қопланди

“Ўзбекфильм”нинг 1 млрд сўмдан ортиқ солиқ қарзи ёпилиб, 12 та автомобили қайтарилди. Бироқ киностудиянинг гарданида ҳали 3 млрд сўмлик иш ҳақи қарзи ва 22 млн евро кредит мажбурияти қолмоқда. Бу ҳақда Маданият вазирининг биринчи ўринбосари – Кинематография агентлиги директори Жаҳонгир Аҳмедов маълум қилди.

Қайд этилишича, “Ўзбекфильм”нинг 1 млрд сўмдан ортиқ солиқ қарзи тўлиқ қопланган. Қарз айнан қайси пуллар эвазига ва қандай шартлар асосида қоплангани эса очиқланмаган.

Шунингдек, аукционга қўйилиши арафасида турган 12 та автомобиль ҳам киностудия ихтиёрига қайтарилган.

Аҳмедовга кўра, ҳозирда ходимларнинг тўпланиб қолган 3 млрд сўмдан ортиқ иш ҳақи қарздорлигини қоплаш бўйича ишлар олиб борилмоқда. Киностудия олдидаги энг катта масала эса 22 млн евро миқдоридаги кредит мажбуриятини ҳал этиш ҳисобланади.

Маданият вазирининг биринчи ўринбосари “Ўзбекфильм”ни ўзининг 10 гектарлик ер майдони билан бирга гаровдан озод қилиш ҳамда кредит мажбуриятини ҳал этиш бўйича Иқтисодиёт ва молия вазирлиги билан биргаликда иш олиб борилаётганини билдирган.

“Ўзбекфильм” инқирознинг эмас, миллий кинематографиянинг рамзи бўлиши керак”, дейди Аҳмедов.

Эслатиб ўтамиз, аввалроқ “Ўзбекфильм”нинг 22,9 миллион евро миқдорида кредит мажбурияти ва 1 миллиард сўмдан ортиқ солиқдан қарзи борлиги маълум бўлган эди.