22 ёшли қиз Туркияда эркаклар жамоасига мураббий бўлди

Туркиянинг “Тургутлуспор” клуби 22 ёшли Зейнеп Местанни бош мураббий этиб тайинлаганини эълон қилди. Бу ҳақда клуб матбуот хизмати хабар берди.

Собиқ футболчи клуб тарихида “Тургутлуспор”нинг эркаклар жамоасини бошқарган биринчи аёл мураббий бўлди.

Клуб президенти Йилмаз Генчтюркнинг таъкидлашича, Местан унинг лойиҳасини кўриб чиқиш ва мураббийлар штаби билан маслаҳатлашувлардан сўнг танланган. Унинг айтишича, Местан жамоага реклама мақсадида таклиф этилмаган. Клуб унинг футбол борасидаги билими, тактик тайёргарлиги ва тақдим этган лойиҳасини баҳолаб, жамоани унга ишониб топширган.

“Ижтимоий тармоқларда кескин муносабат билдирилишини билардим. Аммо биз майдондаги ўйинга ва мавсум якунида эришадиган натижамизга тўлиқ эътибор қаратамиз”,  дейди Местан.

Янги бош мураббий узоқ муддатли мақсадини ҳам белгилаб олган. У “Тургутлуспор”ни беш йил ичида Туркиянинг иккинчи даражали чемпионати – Биринчи лигага олиб чиқишни режалаштирмоқда. Айни пайтда клуб Туркия футболининг ҳаваскорлар даражасидаги мусобақаларида иштирок этмоқда.

Маълумот учун, Местан 2004 йил 30 июль куни Измирда туғилган. У футболчилик фаолиятини 2019 йилда бошлаган ва “Каршияка”, “Коньяк Беледиеспор”, “Борнова Хитаб Спор” каби клубларда тўп тепган.