2020 йилдан давлат ходимлари ўртасида “Ўзбек полвони” мусобақаси ўтказилади

2021 йилдан бошлаб хорижий давлатларда Ўзбекистон Республикаси Президенти соврини учун кураш бўйича халқаро турнирлар ўтказилади. Бу ҳақда Ўзбекистон Республикаси Президентининг “Кураш миллий спорт турининг халқаро нуфузини янада ошириш чора-тадбирлари тўғрисида”ги фармони лойиҳасида келтириб ўтилган. 

Ҳужжатга мувофиқ, ҳар икки йилда бир марта:

•  2020 йилдан бошлаб вилоятлар марказлари, Тошкент ва Нукус шаҳарларида олий таълим муассасалари талабалари ўртасида халқаро кураш мусобақаси;

•  2021 йилдан бошлаб равишда хорижий давлатларда Ўзбекистон Республикаси Президенти соврини учун кураш бўйича халқаро турнирлар;

•  2020 йилдан бошлаб ҳар йилда бир марта давлат органлари ходимлари ўртасида кураш бўйича “Ўзбек полвони” республика мусобақаси ўтказилади;

•  2020-2022 йилларда вилоятлар марказлари, Нукус ва Тошкент шаҳарларида Ўзбекистон Республикаси Давлат бюджети маблағлари ҳисобидан молиялаштириладиган Ўзбекистон Республикаси Жисмоний тарбия ва спорт вазирлиги ҳузуридаги кураш маҳорат спорт мактаблари (кейинги ўринларда – кураш маҳорат мактаблари) босқичма-босқич ташкил этилади;

•  кураш маҳорат мактабларининг раҳбарлари, тренерлари ва бошқа ходимларига олимпия захиралари коллежлари учун белгиланган меҳнатга ҳақ тўланади ва моддий рағбатлантириш шартлари қўлланилади;

•  Кураш халқаро ассоциацияси ва Ўзбекистон кураш федерацияси муассислигида Халқаро кураш институтини қайта ташкил этилади.