200 минг долларлик олмосни оғзига яширган сайёҳ қамалди

Чет эллик фуқаро Сингапурдаги заргарлик дўконидан қимматбаҳо тошни оғзига яширган ҳолда ўғирлаб кетди ва бу қилмиши учун қамалди. Бу ҳақда “The Straits Times” хабар берди.

Қайд этилишича, бугун, 1 сентябрь куни Сингапур суди чет эллик туристни жуда йирик миқдордаги ўғрилик учун икки йил-у тўрт ойлик қамоқ жазосига ҳукм қилган. Жиноят шаҳардаги энг ҳашамдор заргарлик дўконларидан бирида содир бўлган. Жиноятчи дўконга қимматбаҳо тақинчоқ сотиб олмоқчи бўлган оддий харидор қиёфасида борган.

Сотувчи мижозга заргарлик буюмларини кўрсатаётган бир вақтда, эркак ходимларнинг эътибори бир лаҳзага чалғиганидан фойдаланиб қолган. У қиймати қарийб 200 минг долларлик олмос тошни сездирмасдан олиб, оғзига яширган. Дўкон ходимлари тошнинг йўқолганини тезда пайқаб қолган ва полиция етиб келгунига қадар бинодан чиқиш йўлларини тўсиб қўйган.

Қўлга олинган шахс охиригача ўз айбини тан олишдан бош тортган, бироқ ҳуқуқ-тартибот идоралари ходимлари уни тиббий кўрикдан ўтказиш учун юборган. Рентген тасвири қўлга олинган шахснинг ҳазм қилиш тизимида ёт жисм борлигини кўрсатган. Тош табиий йўл билан чиқариб олингач, жиноятчи судда ўз айбига иқрор бўлган.

Эслатиб ўтамиз, аввалроқ Тошкент вилоятидаги “Навоий” чегара божхона постида болалардан фойдаланган ҳолда тилла қуймалари ва йирик миқдордаги нақд валютани мамлакатдан ноқонуний олиб чиқишга уринишлар аниқланганди.