18 яшар қизнинг собиқ севгилиси мактабга ҳужум қилди. Қурбонлар бор

Бугун, 27 август куни Германиянинг Бранденбург федерал заминидаги мактабга қилинган ҳужум оқибатида икки киши ўлдирилди, гумонланувчи қўлга олинди. Бу ҳақда “Märkische Allgemeine Zeitung” хабар берди.

“Пайшанба куни Гозен-Ной-Циттау (Одер-Шпрее тумани)даги мактаблардан бирида икки киши ўлдирилди... Гумон қилинаётган жиноятчи қўлга олинди”, дейилади хабарда.

Газета маълумотларига кўра, қурбонлардан бири 18 ёшли ўқувчи қиз. Иккинчи ҳалок бўлган шахс 30 ёшли эркак. Тахминларга кўра, у жиноятчига халақит беришга уринган вақтида ҳалок бўлган. Гумон қилинаётган жиноятчи 19 ёшда бўлиб, у 18 ёшли қизнинг собиқ сегилиси бўлиши мумкин.

Бранденбург полицияси воқеа жойида бўлиб турибди ва мактаб атрофидаги ҳудудни ўраб олган. Воқеа жойида кўплаб қутқарув хизмати автомобиллари ҳам бор. Дастлабки маълумотларга кўра, қўшимча равишда иккита қутқарув вертолёти ҳам жалб қилинган.

Эслатиб ўтамиз, аввалроқ Швециянинг Фагерста шаҳридаги мактабда полиция ходимлари қилич билан қуролланган шахсни отиб ўлдирганди.