Ҳусийлар Исроил кемасига ёрдамга келган АҚШ эсминецига ҳужум қилди

Ямандан АҚШ ҳарбий-денгиз кучларининг USS Mason эсминеци томон икки баллистик ракета учирилди. Бу ҳақда АҚШ Марказий қўмондонлигининг (CENTCOM) X ижтимоий тармоғидаги саҳифасида маълум қилинди.

“27 ноябрь куни Яманнинг ҳусийлар назоратидаги ҳудудларидан USS Mason (DDG 87) ҳарбий кемаси ва USS Central Park теплоходининг умумий жойлашуви томон иккита баллистик ракета учирилди”, дейилади CENTCOM хабарида.

Таъкидланишича, ракеталар Адан кўрфазига, кемалардан ўн денгиз мили (18,5 км) узоқликка тушган. Бу АҚШнинг USS Mason кемаси Исроил танкерининг фавқулодда чақирувига жавоб беришни тугатаётганда содир бўлган. Ҳужумга қарамасдан кемаларнинг ҳеч бири зарар кўрмаган.

Эслатиб ўтамиз, Яман қирғоқларида Исроилнинг Zodiac Maritime компаниясига тегишли бўлган Central Park танкери қўлга олинганди. АҚШнинг USS Mason эсминеци номаълум шахслар томонидан ҳужумга учраган Central Park кемасининг фавқулодда чақирувига жавоб қайтарган. Шундан сўнг беш нафар қуролланган шахс кемадан тушиб, кичик қайиқларида қочишга ҳаракат қилган. Бироқ USS Mason уларни тақиб қилиб қўлга олган.