ҲАМАС қуролсизланмагунча Ғазо қайта тикланмайди – Трампнинг куёви (видео)

АҚШ Президенти Дональд Трампнинг куёви ва тинчлик бўйича махсус вакили Жаред Кушнер ҲАМАС қуролсизланмагунча Ғазо секторини қайта тиклашга рухсат берилмаслигини айтди. Бу ҳақда у “Fox News” телеканалига берган интервьюсида сўз очди.

Кушнернинг сўзларига кўра, АҚШ Ғазони қайта тиклаш режасига эга, бироқ ҳудудда қуролсизланиш амалга оширилмагунча реконструкция бошланмайди.

“Бизда Ғазони қайта тиклаш режаси бор, аммо қуролсизлантириш амалга ошмагунча бунга йўл қўймаймиз”, деган Кушнер.

Унинг сўзларига кўра, ҲАМАС қуроллари ва туннелларини топширса, бу Исроил учун катта хавфсизлик таҳдидининг йўқ қилинишига олиб келади. Кушнер ҲАМАС буни яқин 60-90 кун ичида амалга оширишидан умид билдирган.

Кушнер кеча, 17 август куни Исроил Бош вазири Биньямин Нетаньяху билан учрашган. Бироқ музокараларда Ғазо бўйича АҚШ томонидан илгари сурилган ва ҲАМАС рози бўлган йўл харитасини амалга ошириш борасида келишувга эришилмаган.

Маълум қилинишича, ҲАМАС қуролсизланиш, Исроил қўшинларининг Ғазодан олиб чиқилиши ва ҳудуддаги ҳужумларни тўхтатишни назарда тутувчи келишувга рози бўлган. Бироқ Исроил Ғазо тўлиқ қуролсизлантирилмагунча ён беришга тайёр эмаслигини билдирган. Кушнер шунингдек, АҚШ Исроилнинг ўзини ҳимоя қилиш ҳуқуқини чекламаслигини билдирган.

“Биз яқинлашиб келаётган таҳдидлар бўлса, Исроилнинг ўзини ҳимоя қилиш ҳуқуқини ҳам чекламаймиз”, деган у.

Эслатиб ўтамиз, аввалроқ Исроил Бош вазири Биньямин Нетаньяху АҚШ Президенти Дональд Трампнинг Ғазодаги урушни тугатиш бўйича янги режасини тўлиқ қабул қилмаслигини билдириб, ҲАМАС қуролсизлантирилмагунча Исроил қўшинлари Ғазодан чиқмаслигини айтганди.