“Ҳали ҳам йиғлаяпман.” Мессининг онаси ўғлининг терма жамоадан кетиши ҳақида гапирди

Лионель Мессининг онаси Селия Куччиттини ўғлининг халқаро фаолиятини якунлаш қароридан сўнг бутун оила қайғуда эканини айтди. Бу ҳақда у журналист Адриан Паллярес билан интервьюда сўз очди.

Месси 21 йилдан сўнг Аргентина терма жамоаси билан хайрлашишини эълон қилди.

“Ҳали ҳам йиғлаяпман. Бу ҳақда олдиндан билган бўлсак-да, бутун оила қайғуда. Лекин энг муҳими, у бахтли”, дейди Куччиттини.

Мессининг онаси, шунингдек, август ойида турмуш ўртоғидан айрилгани бу даврни оила учун янада оғирлаштирганини таъкидлади.

У эри Лео ҳақида тез-тез: “У энди футбол ўйнамай қўйса, мен нима қиламан?”, дея айтганини ҳам эслади.

Месси хайрлашув мактубида оиласи, мураббийлари, жамоадошлари ва Аргентина терма жамоасидаги узоқ йиллик фаолияти давомида у билан бирга ишлаган барча инсонларга миннатдорлик билдирди.

Афсонавий ҳужумчи миллий терма жамоа билан хайрлашаётганда қалбида фахр ва хотиржамлик ҳисси борлигини таъкидлади.

Маълумот учун, 39 ёшли Месси 2023 йилдан бери Шимолий Америка Олий футбол лигаси (MLS) вакили “Интер Майами”да тўп тепиб келмоқда. Европада аргентиналик футболчи Франциянинг ПСЖ ва Испаниянинг “Барселона” клубларида ўйнаган. “Барселона” билан у тўрт марта Чемпионлар лигаси, уч мартадан UEFA Суперкубоги ва Клублар ўртасидаги жаҳон чемпионатида ғолиб чиққан.

Ҳужумчи 2022 йилги жаҳон чемпиони, 2014 ва 2026 йилги Жаҳон чемпионатларининг кумуш медали соҳиби, 2008 йилги Олимпиада чемпиони ҳамда 2021 ва 2024 йиллардаги Копа Америка ғолиби ҳисобланади. Месси “Олтин тўп”ни энг кўп марта қўлга киритган футболчи – 8 карра соврин соҳиби.

Месси Аргентина терма жамоаси сафида 207 та учрашувда майдонга тушиб, 125 та гол урган. У ҳар икки кўрсаткич бўйича ҳам терма жамоа рекордчиси ҳисобланади. Ҳужумчи жаҳон чемпионатларида олти марта иштирок этган.