Norboyeva yoki Mirziyoyevaning munosabatini kutish shart emas – Kusherboyev Yo‘ldosheva ishiga munosabat bildirdi

Toshkent viloyati Yuqumli kasalliklar shifoxonasi Bosh shifokori Guljahon Yo‘ldosheva ishi kun tartibida turibdi. Avval xabar berganimizdek, unga nisbatan tayinlangan qamoqqa olish ehtiyot chorasi uy qamog‘iga o‘zgartirildi va Yo‘ldosheva oilasi bag‘riga qaytdi. Oliy Majlis Qonunchilik palatasi deputati Rasul Kusherboyevning fikricha, adolatni tiklash uchun Norboyeva va Mirziyoyevaning munosabat bildirishini kutish shart emas. 

“Adolatni tiklash, vijdonni uyg‘otish va eng muhimi fuqaroning inson sifatidagi huquqlarini himoya qilishga o‘tish uchun Tanzila Norboyeva yoki Saida Mirziyoyevaning aynan munosabatini kutish shart emas, deb o‘ylayman. 

Shunchaki "topshiriq" emas qonun bilan ishlashga jur’atni yig‘ish kerak xolos. Topshiriqlar har doim ham qonuniy bo‘lmasligi mumkin”, deb yozadi Kusherboyev. 

Ayni vaqtda Guljahon Yo‘ldosheva ishi va unga tayinlangan uy qamog‘ida saqlash ehtiyot chorasi ijtimoiy tarmoqlarda ko‘plab bahs-munozaralarga sabab bo‘lmoqda. Jamoatchilikning fikricha, mamlakatda qonunlar unga kimdir turtki bergandan keyin ishlashi qonunchilikdagi muammolar va ijro organlarining kamchiliklarini yuzaga chiqaradi. 

Eslatib o‘tamiz, 5 oktyabr kuni O‘zbekiston Respublikasi Prezidenti Shavkat Mirziyoyevning to‘ng‘ich qizi – Milliy mass-mediani qo‘llab-quvvatlash va rivojlantirish jamoat fondi Vasiylik Kengashi raisi o‘rinbosari, Gender tenglikni ta’minlash masalalari bo‘yicha komissiya a’zosi Saida Mirziyoyeva prokuraturadan Guljahon Yo‘ldoshevaga nisbatan qamoqqa olish ehtiyot chorasini o‘zgartirishni so‘rab chiqqan edi. 

Yo‘ldosheva ishi 

Toshkent viloyati yuqumli kasalliklar shifoxonasi bosh shifokori, viloyat bosh infeksionisti Guljahon Yo‘ldosheva koronavirus kasalligiga chalingan bemor o‘limiga sababchi bo‘lish va 250 mln so‘m mablag‘ni talon-toroj qilishda ayblanib hibsga olingandi. 

U Zangiota tumanida joylashgan tergov hibsxonasining ayollar bo‘linmasida saqlanayotgan edi. 

Yo‘ldoshevaga nisbatan O‘zbekiston Respublikasi Jinoyat kodeksining 116-moddasi 3-qismi bilan jinoyat ishi qo‘zg‘atilgan edi. 

Joriy yilning 8 sentyabr kuni shifoxona Bosh shifokori Guljahon Yo‘ldosheva majburiy tartibda tergovga olib kelinib, Jinoyat kodeksining 167-moddasi 3-qismi “a” bandi hamda 207-moddasi 3-qismi “a” bandi bilan ayblanuvchi tariqasida ishda ishtirok etishga jalb etilgan.
 
Prokuratura bayonotiga ko‘ra, ayblanuvchi Guljahon Yo‘ldosheva tergov harakatlarini amalga oshirishga to‘sqinlik qilayotgani, o‘ziga yuklatilgan majburiyatlarni bajarmayotgani, u tomonidan sodir etilgan jinoyat og‘ir jinoyatlar turkumiga kirishi, shuningdek, uning jinoiy faoliyat bilan shug‘ullanishiga barham berish, qochib ketishining, dalillarni yashirishi yoki yo‘q qilib yuborishining oldini olish maqsadida protsessual tartibda ushlanib, sudning 9 sentyabrdagi ajrimi bilan unga nisbatan “qamoqqa olish” extiyot chorasi qo‘llanilgan.

Biz bugungacha ushbu ish yuzasidan Toshkent viloyati Chirchiq shahri prokurori Baxtiyor Ibrohimov, viloyat Ruhiy asab kasalliklari dispanseri Bosh shifokori Feruza Shonosirova, Toshkent viloyati Yuqumli kasalliklar shifoxonasida vafot etgan shifokor Farrux Rustamovning rafiqasi Kamola Rustamova, Toshkent viloyati Sog‘liqni saqlash boshqarmasi boshlig‘ining birinchi o‘rinbosari Nizom Abdullayev bilan suhbatlashdik. Ushbu intervyularda ular bir ovozda Guljahon Yo‘ldoshevani ayblagan. QALAMPIR.UZ voqealarga yanada aniqlik kiritish, ikkinchi tarafning fikrlarini tinglash maqsadida Guljahon Yo‘ldoshevaning himoyachisi Xushnud Axrorovga mikrofon tutdi.