Janubiy Koreya parlamenti Prezidentga impichment e’lon qildi

Janubiy Koreya parlamenti bugun, 14 dekabr kuni Prezident Yun Sok Yolga impichment e’lon qilish uchun ovoz berdi. Bu haqda parlament spikeri Vu Von Sik ma’lum qildi.

“Harbiy holat e’lon qilingan paytdan to shu paytgacha xalqning demokratiya uchun ko‘rsatgan jasorati va fidoyiligi bu qarorga olib keldi”, degan parlament spikeri.

Ovoz berishda barcha 300 deputat ishtirok etgan. Impichmentni 204 nafar deputat qo‘llab-quvvatlagan. 85 kishi qarshi chiqqan, uch nafari betaraf, yana 8 nafari esa haqiqiy emas deb topgan.

Endilikda Konstitutsiyaviy sud ish yuritishni boshlaydi va impichmentni tasdiqlash yoki Yun Sok Yolni qayta tiklash to‘g‘risida qaror qabul qiladi. Ishni ko‘rib chiqish 6 oygacha davom etishi mumkin. Ya’ni sud 180 kun ichida uni prezidentlik lavozimidan ozod etish yoki uning vakolatlarini tiklashni aniqlashi mumkin. Agar u lavozimidan chetlatiladigan bo‘lsa, 2017 yilda sobiq prezident Pak Kin Xedan keyin hokimiyatdan chetlatilgan ikkinchi prezidentga aylanadi va 60 kun ichida uning o‘rinbosarini tanlash uchun milliy saylov o‘tkazilishi kerak.

Bu Yun Sok Yolning impichmenti bo‘yicha Milliy Assambleyadagi ikkinchi ovoz berish edi. 7 dekabr kuni u impichment bo‘yicha ovoz berishdan omon qolgandi, chunki hukmron partiya qonunchilari ko‘pchilik ovoz berishni boykot qilgandi. O‘shandan beri “Xalq kuchi” partiyasining ba’zi qonunchilari Yun Sok Yolga qarshi ommaviy norozilik kuchayib, uning ma’qullash reytingi keskin tushib ketgani sababli, ikkinchi ovoz berishda Yunning impichmenti uchun ovoz berish niyatlarini e’lon qilgandi.

Janubiy Koreyada 40 yildan ortiq vaqtdan beri birinchi marta bo‘lgan Yunning harbiy holat joriy etishi bor-yo‘g‘i olti soat davom etdi, biroq katta siyosiy g‘alayonlarga sabab bo‘ldi, diplomatik faoliyatni to‘xtatdi va moliyaviy bozorlarni chalkashtirib yubordi. Parlament uni bekor qilish uchun bir ovozdan ovoz berganidan keyin Yun o‘z farmonini bekor qilishga majbur bo‘ldi.

Eslatib o‘tamiz, avvalroq Janubiy Koreya parlamenti Adliya vaziri Pak Son Chje va politsiya bosh komissari Cho Chji Xoga harbiy holat joriy etilgani uchun impichment e’lon qilgandi. Vazirning iste’fosini 295 deputatdan 195 nafari qo‘llab-quvvatlagan, 100 nafari esa qarshi chiqqan. Cho Chji Xoning impichmentini 202 nafar deputat ma’qullagan bo‘lsa, 88 nafari qarshi ovoz bergan va bir deputat betaraf qolgan.