Zelenskiy Rim statutini ratifikatsiya qildi

Ukraina Prezidenti Vladimir Zelenskiy bugun, 24 avgust kuni Xalqaro jinoiy sud faoliyati asosi bo‘lgan Rim statutini ratifikatsiya qiluvchi qonunni imzoladi.

Oliy Rada veb-saytidagi qonun loyihasiga ko‘ra, u Zelenskiy tomonidan Oliy Radaga taqdim etilgan va 15 avgust kuni ro‘yxatga olingan.

"Yana bir loyiha Ukrainaning Jinoyat va Jinoyat-protsessual kodekslariga ratifikatsiya fonida o‘zgartirishlar kiritishni nazarda tutadi", deb yozdi Ukrainaning “Xromadske” internet nashri.

Qayd etilishicha, agar qonun ratifikatsiya qilinsa, Ukraina XJSning to‘laqonli a’zosi bo‘lishi mumkin bo‘ladi. Keyinchalik, Ukraina Sudning to‘liq a’zoligiga ega bo‘ladi va Rim statutiga a’zo davlatlar Assambleyasi ishida ishtirok etadi.

Ukraina Oliy Radasi 21 avgust kuni Rim statutini ratifikatsiya qilish uchun ovoz berdi. O‘shanda mamlakat Tashqi ishlar vaziri Dmitriy Kuleba bu qadam Kiyevning Rossiyaning Ukrainadagi harbiy jinoyatlarida ishtirok etganlarni javobgarlikka tortishga qaratilgan XJS bilan hamkorligini yanada samaraliroq qilishi kerakligini aytgandi.

Hozirgacha Gaagadagi Xalqaro jinoiy sudi allaqachon harbiy jinoyatlarda ayblangan rossiyaliklarni hibsga olish uchun oltita order, jumladan, Rossiya Prezidenti Vladimir Putinni hibsga olishga order bergan.

Bugungi kunga kelib, Xalqaro jinoiy sud ish yurituvchi Rim statutini 137 davlat, jumladan, Ukraina ham imzolagan. Shu bilan birga, ushbu hujjatni ratifikatsiya qilgan davlatlar soni 124 tani tashkil etadi. Rim statutining ratifikatsiya qilinishi Xalqaro jinoiy sudning yurisdiksiyasini tan olish va uning hukmlarini majburiy ijro etishni nazarda tutadi. Kiyev Rim statutini 2000 yilda imzolagan, biroq uni uzoq vaqt ratifikatsiya qilmagan edi.