Yevropa Samarqanddagi sammit orqali AQSHga javob qaytarmoqchi

Yevropa Komissiyasi rahbari Ursula fon der Lyayen Samarqandda bo‘ladigan sammitni Yevropaning AQSH bojlariga javob berish strategiyasining bir qismi deb atadi. Bu haqda u Strasburgda Yevroparlament sessiyasidagi nutqida so‘z ochdi.  

Uning so‘zlariga ko‘ra, joriy yilning 4 aprel kuni Samarqand shahrida bo‘lib o‘tadigan “Markaziy Osiyo – Yevropa Ittifoqi” sammiti Yevropa Ittifoqining xorijiy hamkorlar bilan savdo munosabatlarini diversifikatsiya qilish strategiyasi doirasida AQSH bojlariga javob berish elementlaridan biri sifatida ko‘rib chiqilmoqda.

“AQSH tariflariga javob strategiyamizning elementi savdoni diversifikatsiya qilish bo‘ladi. Savdo biznes mavjud bo‘lgan joyga yo‘naltiriladi. Yevropa allaqachon 76 mamlakat bilan savdo bitimlariga ega va Yevropa Ittifoqi bu tarmoqni kengaytirmoqda”, dedi Ursula fon der Lyayen.

Uning so‘zlariga ko‘ra, u shu hafta Yevropa Kengashi raisi Antoniu Koshta bilan birgalikda Yevropa Ittifoqi va Markaziy Osiyo davlatlari o‘rtasidagi tarixda birinchi marta tashkillashtirilayotgan sammitda qatnashish uchun Samarqandga yo‘l oladi.

Qayd etish joiz, AQSH Prezidenti Donald Tramp ertaga, 2 aprel kuni bir qator davlatlar, jumladan, Yevropa Ittifoqi davlatlari uchun yangi tariflarni e’lon qilmoqchi.

“Asosan, bu 25% boj degani va bu mashinalar va boshqa narsalarga tegishli bo‘ladi. Yevropa Ittifoqi Qo‘shma Shtatlar uchun hayotni ayanchli qilish uchun tuzilgan va ular bu ishni ajoyib tarzda qilishdi”, degan Tramp fevral oyi oxirida jurnalistlarga. 

Ma’lumot uchun, Yevropa Ittifoqi va Markaziy Osiyo o‘rtasidagi ilk sammit 3-4 aprel kunlari Samarqand shahrida bo‘lib o‘tadi. Uchrashuvga O‘zbekiston Prezidenti Shavkat Mirziyoyev raislik qiladi va unda Qozog‘iston, Qirg‘iziston, Tojikiston va Turkmaniston yetakchilari ishtirok etadi. 4-5 aprel kunlari esa “Silk Road Samarkand” kongress markazida birinchi Samarqand iqlim forumi bo‘lib o‘tadi. Forumda Markaziy Osiyo davlatlari, jumladan, O‘zbekiston, Qozog‘iston, Qirg‘iziston, Tojikiston va Turkmaniston rahbarlari, shuningdek, Yevropa Ittifoqi, BMT, xalqaro moliya institutlari va yetakchi ekologiya tashkilotlari vakillari ishtirok etishi kutilmoqda.

Sammit davomida Yevroittifoq o‘zaro manfaatli sohalarda hamkorlikni kengaytirish bo‘yicha sodiqligini tasdiqlashi kutilmoqda. Bular qatoriga transport va raqamli aloqa, muhim xomashyo resurslari, iqtisodiy va xavfsizlik sohalaridagi sheriklik hamda energetik o‘tish jarayoni kiradi.

Eslatib o‘tamiz, avvalroq sammit munosabati bilan Samarqand shahriga kirish yo‘llari vaqtincha yopilishi haqida xabar berilgandi. Keyinroq esa mazkur sammit o‘tkazilishi munosabati bilan shahardagi ayrim oliy ta’lim muassasalariga 1-5 aprel kunlari qisqa muddatli o‘quv ta’tili berilishi ma’lum bo‘ldi.