Yevropa Rossiya bilan urushga bardosh bera olmaydi – OAV

NATO bilan ishlaydigan harbiy rejalashtiruvchilar Yevropa hozirgi vaqtda Rossiya bilan uzoq davom etadigan tinkani quritadigan urushga bardosh berishga qodir emas, deb hisoblamoqda. Bu haqda joriy haftada Yevropadagi harbiy koordinatsiyaning kelajagiga bag‘ishlangan konferensiyada so‘z yuritildi.

Rejalashtiruvchilarning fikricha, Yevropa jamiyati uzoq muddatli harbiy qarama-qarshilikni qo‘llab-quvvatlashga tayyor bo‘lmasligi mumkin. Shu sababli, NATO nisbatan qisqa muddatli nizo ssenariysiga tayyorlanishi zarur. AQSHning Yevropa mudofaasi sohasidagi majburiyatlarini qisqartirishga tayyorgarligi va Yevropadagi eng yirik harbiy davlatlarda populistik kuchlarni qo‘llab-quvvatlash ortib borayotgani fonida xavotirlar yanada kuchaymoqda.

Nashrning yozishicha, Buyuk Britaniya kabinetining yaqinda tayinlangan a’zolaridan biri G‘arb aholiga Rossiya bilan gibrid qarama-qarshilikning ko‘lamini yomon tushuntirganini tan olgan. Boshqa bir britan diplomati ham uning fikriga qo‘shilib, Buyuk Britaniyaning ketma-ket almashgan bosh vazirlari xavf ko‘lamini jamiyatga yetkaza olmaganini ta’kidlagan. Uning so‘zlariga ko‘ra, endi hukumatlar mudofaa xarajatlarini oshirish uchun tayyorgarlikka ega bo‘lmagan saylovchilarni ijtimoiy xarajatlarni qisqartirishga ishontirishlariga to‘g‘ri kelmoqda. 

“Muhokama darajasini bog‘cha yoshidagi bolalar suhbatiga qiyoslash mumkin”, deydi diplomat.

Konferensiyada, shuningdek, Rossiya siyosiy va ijtimoiy qarama-qarshiliklardan foydalangan holda Yevropa bilan gibrid qarama-qarshilikda g‘alaba qozonishi mumkinligi haqidagi xavotirlar ham muhokama qilingan. Diplomatlardan birining so‘zlariga ko‘ra, Sovuq urush tugaganidan keyin Moskva Yevropa jamiyatining “ham so‘l, ham o‘ng” qanotidagi xavotirlarini o‘z manfaati yo‘lida ishlatish imkoniyatiga ega bo‘lgan. Bu kelasi yili Polsha, Fransiya va Italiyada bo‘lib o‘tadigan saylovlarda o‘ng-populistik kuchlarning yanada o‘sishiga xizmat qilishi mumkin. Populistik partiyalarning aksariyati, jumladan, Germaniyaning “Germaniya uchun muqobil” (AfD) partiyasi Rossiyaga xayrixohlik bildiradi.

Ushbu fonda Myunxen xavfsizlik konferensiyasi (MSC) doirasida Yevropaning beshta yetakchi harbiy davlatining yanada yaqinroq koordinatsiyasi g‘oyasi ilgari surilmoqda. “Ye5” guruhi allaqachon muntazam ravishda yig‘ilib, hozirda asosan AQSH tomonidan taqdim etiladigan integratsiyalashgan havo hujumidan mudofaa va raketaga qarshi mudofaa tizimlari, uzoq masofaga mo‘ljallangan yuqori aniqlikdagi qurollar hamda barvaqt ogohlantiruvchi kosmik tizimlarni birgalikda xarid qilishni muhokama qilmoqda. MSC raisi Volfgang Ishinger Yevropa mudofaa sohasida yanada jipslashishni talab qiladigan “ulkan va ekzistensial tahdidlarga” duch kelayotganini ma’lum qilgan.