Yevroittifoq komissari O‘zbekistonga keladi

Yevropa Ittifoqining xalqaro hamkorlik bo‘yicha komissari Jozef Sikela 12-18 mart kunlari Markaziy Osiyo mamlakatlari, shu jumladan, O‘zbekistonga ham tashrif buyuradi. Bu haqda u o‘zining X ijtimoiy tarmog‘ida yozib qoldirdi.

Uning yozishicha, tashrif doirasida komissar 7 kun ichida beshta davlatga tashrif buyuradi.

“Markaziy Osiyo Yevropa Ittifoqi uchun muhim hamkordir va bizning hamkorligimiz kelajakda katta potensial ochadi. Joriy global chaqiruvlar hech qachon bizning mustahkam hamkorlik aloqalariga bo‘lgan ehtiyojni shunday ta’kidlab ko‘rsatmagan. Mana, men o‘z missiyam davomida aynan shuni mustahkamlashni maqsad qilganman”, degan u o‘z postida.

Qayd etilishicha, Sikela ushbu tashrif davomida YeI va Markaziy Osiyo mamlakatlari birgalikda amalga oshirayotgan asosiy loyihalarga e’tibor qaratadi. Ular orasida texnologiyalarni rivojlantirish va muhim xomashyo sohasida ish o‘rinlari yaratish, raqamli o‘zaro bog‘liqlikni kengaytirish, xavfsiz yuqori tezlikdagi internetga kirishni yaxshilash, shuningdek, suv resurslari, energetika va ekologiya sohalarida loyihalarni qo‘llab-quvvatlash kiritilgan.

Uning sayohati Turkmanistondan boshlanadi. Unda komissar hukumat va biznes vakillari bilan muzokaralar olib boradi, shuningdek, Transkaspiy transport yo‘li uchun strategik ob’ekt bo‘lgan “Turkmangala” portiga boradi.

Qolaversa, u Qozog‘istonda hukumat vakillari bilan uchrashadi va transport va muhim xomashyo sohalarida ikki tomonlama va mintaqaviy kelishuvlarni imzolashda ishtirok etadi. Tojikistonda esa Sikela mamlakat rahbariyati bilan bir qator uchrashuvlar o‘tkazib, yashil energiya va to‘qimachilik sanoati sohalarida loyihalarni imzolashni rejalashtirgan.

Qirg‘izistonda komissar suv resurslari, energetika, transport va insoniy salohiyatni rivojlantirish sohalaridagi investitsiya loyihalarini muhokama qiladi va “Qambarota-1” gidroelektr stansiyasini qurishda moliyaviy yordamni muhokama qilish uchun xalqaro moliyaviy institutlar vakillari bilan uchrashadi.

Ma’lum qilinishicha, ushbu tashrif O‘zbekistonda yakunlanadi, bu yerda hukumat bilan muzokaralar olib boriladi. “Olmaliq” tog‘-metallurgiya kombinatini ziyorat qiladi, shuningdek, Yevropa va o‘zbek biznes vakillari bilan uchrashadi.