Yelena Zelenskaya Bayden va uning rafiqasi bilan uchrashdi

Ukraina birinchi xonimi Yelena Zelenskaya AQSHga tashrifi doirasida Oq uyda Amerika Qo‘shma Shtatlari Prezidenti Jo Bayden va birinchi xonim Jill Bayden bilan uchrashdi. Ukraina davlat rahbarining rafiqasi, Oq uy ayvonida Prezident Jo Bayden va vitse-prezident Kamala Xarris tomonidan kutib olingan. 

Birinchi xonimlar o‘rtasida o‘tgan uchrashuvda Ukrainada amalga oshirilishi boshlangan Ruhiy salomatlik va psixo-ijtimoiy qo‘llab-quvvatlash milliy dasturi muhokama qilingan. Uni amalga oshirish uchun xorijiy, jumladan, amerikalik mutaxassislarning urush oqibatida yuzaga kelgan travmatik vaziyatlar oqibatlarini bartaraf etish bo‘yicha ekspert maslahati talab etiladi. 

“Ukraina va AQSHning birinchi xonimlari bir qator gumanitar loyihalarga katta e’tibor qaratdilar, ularning maqsadi urushdan aziyat chekkan odamlarning ahvolini yengillashtirishdir. Xususan, ukrainalik bolalarning AQSHda davolanishi va ularni Amerika klinikalarida protezlash, shuningdek, bir qator ta’lim tashabbuslari va vaqtinchalik ko‘chirilgan shaxslarga yordam ko‘rsatish haqida so‘z yuritildi”, deyiladi Ukraina Prezidenti ma’muriyati tarqatgan xabarda.  

Yelena Zelenskayaning ta’kidlashicha, bu birinchi xonim uchun g‘ayrioddiy tuyulsa-da, bugungi kunda asosiy vazifa AQSH tomonidan Ukrainaga bolalar va tinch aholini himoya qilish va urushdagi g‘alabani tezlashtirishga yordam beradigan kuchli aniq qurollarni yetkazib berishdir. 

Prezidentning rafiqasi Rossiya armiyasidan harbiy jinoyatchilar to‘g‘risida tasdiqlangan ma’lumotlarni to‘playdigan “Ukraina xalqi jallodlari kitobi” loyihasi haqida ham gapirdi. U Qo‘shma Shtatlarga Birlashgan Millatlar Tashkilotida nafaqat Rossiyani qoralash, balki uni yakkalab qo‘yish va BMT Inson huquqlari kengashidagi o‘rnini olib tashlash bo‘yicha katta sa’y-harakatlari uchun minnatdorlik bildirdi va sanksiyalarni yanada kuchaytirish va Rossiyani terrorizm homiysi sifatida tan olishga chaqirdi.

“Ukrainada va Amerikada "kuchli ayol" tushunchasi bir xil: ayol mas’uliyatni o‘z zimmasiga oladi va eng qiyin vaziyatlarda qaror qabul qiladi. U Amerikaning qudratli ayollariga, jumladan diplomatlar va senatorlarga kuchli ukrainalik ayollar haqida gapirib berdi. Hozir har birimiz shundaymiz. Ukraina Qurolli Kuchlari safida jang qilayotganlar, o‘t ostida ishga ketayotganlar, farzandlari uchun yangi joyda hamma narsani boshidan boshlaganlar haqida. Bizda kuchli ayollarning butun mamlakati bor!”, dedi uchrashuvda Yelena Zelenskaya.