YeI yetakchilari Trampning g‘alabasini favqulodda muhokama qiladi

Yevropa Ittifoqi yetakchilari 7-8 noyabr kunlari Budapeshtda bo‘lib o‘tadigan sammitda respublikachi Donald Trampning AQSH prezidentlik saylovlarida g‘alaba qozonganidan so‘ng Yevropa Ittifoqining keyingi harakatlari yuzasidan favqulodda muhokama o‘tkazadi, asosiy mavzular Yevropa Ittifoqi va AQSH o‘rtasida yangi savdo urushi xavfi va Vashington tomonidan Kiyevga yordamning kamayishi bo‘ladi. Bu haqda Bryusseldagi diplomatik manbaga tayanib, TASS xabar berdi.

“Budapeshtdagi norasmiy sammit yetakchilar uchun Tramp g‘alabasi oqibatlariga YeIning tayyorgarligi yuzasidan favqulodda muhokama o‘tkazish uchun yaxshi imkoniyat bo‘ladi. Bu yerda ushbu hodisa ikkita asosiy xavf bilan bog‘liq – yangi savdo urushi boshlanishiga qadar Qo‘shma Shtatlar bilan iqtisodiy munosabatlarning murakkablashishi va Ukrainaga harbiy yordamni qisqartirish ehtimoli”, dedi diplomat.

Uning qo‘shimcha qilishicha, Donald Tramp hokimiyatga kelganidan so‘ng AQSH bilan munosabatlar muhokamasi 18 noyabr kuni Bryusselda bo‘lib o‘tadigan YeI Tashqi ishlar vazirlarining uchrashuvida davom etadi.

“Yetakchilar Yevropa Ittifoqi Tashqi ishlar vazirlariga yangi respublika ma’muriyati bilan o‘zaro hamkorlik bo‘yicha aniq takliflar ishlab chiqish bo‘yicha ko‘rsatmalar tayyorlashlari kerak”, dedi u.

Manbaning eslatishicha, AQSH saylovlaridan oldin ham Yevropa doiralarida Tramp g‘alaba qozonsa, YeI Amerika investitsiyalari qisqarishini qoplash uchun Kiyevga qurol yetkazib berish va moliyaviy yordamni yana bir bor oshirishga tayyor bo‘lishi kerakligi haqida konsensus shakllana boshlagan edi.

AQSH saylovlarida ovoz berish Toshkent vaqti bilan 6 noyabr kuni ertalab yakunlandi. Rasmiy natijalar hali e’lon qilingani yo‘q, biroq “Fox News” prognozlariga ko‘ra, Tramp zarur bo‘lgan 270 ovoz bilan 277 ta ovozni qo‘lga kiritgan. Uning o‘zi allaqachon o‘zini AQSHning 47-prezidenti deb e’lon qilgan.

Vakillar palatasi spikeri Mayk Jonson uni saylangan davlat rahbari deb atadi, Tramp allaqachon xorijiy yetakchilardan, xususan, Bryusseldagi Yevropa Ittifoqi institutlarining barcha rahbarlaridan, shuningdek, NATO Bosh kotibidan tabriklar olishni boshlagan. Trampni tabriklaganlar orasida Markaziy Osiyo davlatlari yetakchilaridan Qirg‘iziston Prezidenti Sadir Japarov, Qozog‘iston rahbari Qosim-Jomart To‘qayev va O‘zbekiston yetakchisi Shavkat Mirziyoyev ham bor.