YeI Eronni yanada ezmoqchi

Yevropa Ittifoqi Eronga qarshi juda qattiq sanksiyalar qo‘llaydi. Bu haqda Yevropa Ittifoqi Tashqi ishlar va xavfsizlik siyosati bo‘yicha oliy vakili Jozep Borrel Bryusselda bo‘lib o‘tadigan YeI Tashqi ishlar vazirlarining uchrashuvi oldidan ma’lum qildi. 

Yevropa diplomatiyasi rahbarining aytishicha, Yevropa Ittifoqi kengashi Tashqi ishlar vazirlari darajasida kun tartibidagi markaziy masala sifatida Eron va Rossiyaga qarshi sanksiyalarni muhokama qiladi. 

Yevropalik diplomatning aytishicha, 9 dekabr kuni kechqurun u eronlik hamkasbi Husayn Amir Abdullohiyan bilan uzoq telefon suhbatida bo‘lib, Rossiyaga Eron qurollari yetkazib berilgani va Eronda ikki namoyishchining qatl etilishini qoralagan. 

“Eronda ular Yevropa Ittifoqi eronlik ayollarning huquqlarini qo‘llab-quvvatlashini tushunishlari kerak”, deydi Borrel. 

Rossiya Federatsiyasiga qarshi sanksiyalarning to‘qqizinchi paketiga kelsak, diplomat bu borada YeIning 27 a’zosining pozitsiyasi turlicha ekanligini tan oldi. 

“Komissiya taklif kiritdi, qarorni Kengash qabul qiladi”, deydi u. 

Borrel Tashqi ishlar vazirlari oxir-oqibat umumiy fikrga kelishlarini inkor etmadi. 

Oxirgi paket 200 ga yaqin shaxs va muassasalarga hamda 3 ta Rossiya bankiga qarshi sanksiyalar, ikki tomonlama maqsadli mahsulotlar eksportini va tog‘-kon sanoatiga sarmoya kiritishni taqiqlashni o‘z ichiga oladi.

Eslatib o‘tamiz, noyabr oyida Yevropa Ittifoqi Erondan ikki jismoniy va ikki yuridik shaxsni Rossiyaga uchuvchisiz samolyotlar yetkazib berishda gumon qilinayotgani sababli qora ro‘yxatga kiritdi.