YeCHL 1/8 finalining barcha ishtirokchilari ma’lum bo‘ldi

Yevropa Chempionlar ligasining 2023/2024 yilgi mavsumi guruh bosqichining 6-tur uchrashuvlari yakunlandi va turnirning pley-off bosqichining barcha 16 ishtirokchisi ma’lum bo‘ldi.

“Bavariya”, “Arsenal”, “Real”, “Real Sosedad”, “Atletiko”, “Borussiya Dortmund”, “Manchester Siti” va “Barselona” o‘z guruhida 1-o‘rin bilan, “Kopengagen”, PSV, “Napoli”, “Inter”, “Latsio”, PSJ, “Leypsig” va “Portu” esa 2-o‘rin bilan keyingi bosqichga yo‘l oldi.

Shunday qilib, Yevropa Chempionlar ligasining 1/8 finalida eng ko‘p Ispaniya jamoalari yo‘l oldi. Mamlakatning to‘rt klubi “Barselona”, “  Real Madrid”, “Atletiko Madrid” va “Real Sosedad” chorak final yo‘llanmasi uchun kurash olib boradi. Italiya va Germaniyadan 3 ta (“Napoli”, “Inter”, “Latsio”, “Bavariya”, “Borussiya Dortmund”, “Leypsig”), Angliyadan ikkita (“Manchester Siti”, “Arsenal”) ), Portugaliya, Niderlandiya, Fransiya va Daniyadan bittadan klub 1/8 final yo‘llanmasiga ega bo‘ldi.

18 dekabr kuni YeCHL 1/8 final bosqichiga qur’a tashlash marosimi bo‘lib o‘tadi. Pley-offning birinchi bosqichida bir davlat va guruh jamoalari to‘qnash kelmaydi. 1/8 final o‘yinlari 2024 yilning 13-14, 20-21 fevral, javob bahslari esa 5-6, 12-13 mart kunlariga belgilangan.