Yaponiya Bosh vaziri Rossiya bilan tinchlik bitimi tuzmoqchi

Yaponiya Bosh vaziri Sigeru Isiba uning hukumati Tokio-Moskva munosabatlaridagi mavjud qiyinchiliklarga qaramay, “hududiy muammoni hal qilish va Rossiya bilan tinchlik shartnomasini tuzish” tarafdori ekanini aytdi. Bu haqda hukumat rahbari bugun, 29 noyabr kuni parlamentdagi asosiy nutqi chog‘ida aytib o‘tdi.

“Yaponiya-Rossiya munosabatlari og‘ir ahvolda, ammo mamlakatimiz hududiy muammoni hal qilish va tinchlik shartnomasini tuzish yo‘lida davom etadi”, dedi u.

Isiba oktyabr oyida parlamentga saylanganidan keyin birinchi asosiy nutqi bilan murojaat qilganida aytgan so‘zlarini so‘zma-so‘z takrorladi.

O‘tgan asrning o‘rtalaridan beri Moskva va Tokio Ikkinchi Jahon urushidan keyin tinchlik bitimini ishlab chiqish bo‘yicha muzokaralar olib bormoqda. Bunga asosiy to‘siq Kuril orollarining janubiy qismiga bo‘lgan huquqlar bo‘yicha kelishmovchiliklar bo‘lib qolmoqda. Urush tugagandan so‘ng, butun arxipelag Sovet Ittifoqi tarkibiga kirdi, ammo Yaponiya Iturup, Kunashir, Shikotan va bir guruh kichik orollarga Rossiya egalik qilishiga e’tiroz bildirib keladi.

Tokio Ukrainadagi vaziyat munosabati bilan Rossiyaga qarshi sanksiyalar kiritgach, Rossiya Yaponiya bilan tinchlik shartnomasi masalasi bo‘yicha maslahatlashuvlarni to‘xtatdi. Shuningdek, Moskva Tokio bilan janubiy Kuril orollarida qo‘shma iqtisodiy faoliyatni yo‘lga qo‘yish bo‘yicha muzokaralardan voz kechdi va Yaponiyaning Qora dengiz iqtisodiy hamkorlik tashkiloti hamkori maqomini sohaviy muloqotda uzaytirilishiga to‘sqinlik qildi.