Yana bir Yevropa mamlakati koronavirus ustidan g‘alaba qozondi

Chernogoriyada 20 kun davomida koronavirus infeksiyasining yangi holatlari qayd etilmadi. Bundan tashqari, Yevropada birinchi bo‘lib ushbu mamlakatda COVID-19 bilan kasallanganlarning barchasi sog‘aydi. Bu haqda Twitterʼda Chernogoriya sog‘liqni saqlash qo‘mitasi ma’lum qildi.

“Chernogoriyada hozirda COVID-19 ning faol holatlari yo‘q. Bu ilk koronavirus bilan bog‘liq holat qayd etilganidan 68 kun o‘tgach ro‘y berdi“, deyiladi xabarda.

Shuningdek, mamlakatda oxirgi 140 odamdan olingan testni tahlil qilish yakunlandi. Ular orasida koronavirus bilan bog‘liq birorta holat qayd etilmagan.

Hukumat ushbu kunda fuqarolarga “ularning qat’iyati va qo‘llab-quvvatlagani uchun“ minnatdorchilik bildirdi.

Eslatib o‘tamiz, taxminan 630 ming aholiga ega bo‘lgan Chernogoriyada ilk bor 17 mart kuni ikki ayolda koronavirus aniqlangan. Epidemiya boshlanganidan beri hukumatning veb-saytiga ko‘ra, bemorlarning umumiy soni 324 kishiga yetgan. Ulardan 315 nafari sog‘aygan, to‘qqiztasi vafot etgan.

Avvalroq, Sloveniya davlati koronavirus ustidan g‘alaba qozonganini e’lon qilgan edi. Lekin, mamlakatda hali faol bemorlar bo‘lgani sababli uning “g‘alabasi“ shunchaki epidemiya tarqalishini to‘xtagani sabab bo‘lgani ma’lum qilindi.