Yana 260 o‘zbekistonlik Xitoydan qaytib kelyapti

Jamiyat 4713
image

Bugun, 5 fevral kuni Xitoydagi yana 260 o‘zbekistonlik Pekindang charter reys bilan Toshkentga uchadi. Bu haqda O‘zbekiston Respublikasi Tashqi ishlar vazirligi xabar bermoqda. 

O‘zbekistonning Pekindagi elchixonasi ma’lumotiga ko‘ra, O‘zbekistonga qaytishni istagan 260 ga yaqin fuqarolarning dastlabki ro‘yxati tuzilgan. 

“Diplomatik vakolatxona tomonidan Xitoyning turli mintaqalarida tahsil olayotgan 800 dan ortiq o‘zbekistonlik talabalar bilan kunu-tun to‘g‘ridan-to‘g‘ri aloqa o‘rnatilgan. Tushuntirish ishlari muntazam ravishda davom ettirilmoqda, xavfsizlik choralari to‘g‘risidagi dolzarb tavsiyalar hamda vatandoshlarni olib ketish bo‘yicha choralarning har bir bosqichi to‘g‘risida ma’lumotlar tizimli tarzda yuborildi va yuborilmoqda. Zarur hollarda turli masalalarni hal qilishda Xitoy hukumati bilar birgalikda yordam ko‘rsatildi. 

Elchixona tomonidan Xitoy rasmiy idoralari, jumladan Xubey provinsiyasi ma’muriyati bilan birgalikda karantin hududidagi O‘zbekiston fuqarolarini bosqichma-bosqich evakuatsiya qilish rejasi ishlab chiqildi va amalga oshirildi. Mazkur provinsiyadagi 20 dan ortiq manzildan hamyurtlarimiz, asosan 14 ta oliy ta’lim muassasasi talabalari Uxan shahri aeroportiga yetkazilib, 5 fevral kuni ertalab “Uzbekistan Airways” AJning charter aviareysi orqali Toshkentga olib kelindi. Samolyot bortida 84 ta yo‘lovchi, jumladan 79 nafar vatandoshimiz vatanga qaytarildi. Qozog‘iston tomonining so‘roviga binoan mazkur samolyot bortida 5 nafar Qozog‘iston fuqarosi ham Xitoydan ortga qaytdi. Ularning ham barchasi karantin davrida maxsus jihozlangan tibbiyot muassasalariga joylashtirildi”, deyiladi TIV xabarida. 

Xitoy hududidagi O‘zbekiston fuqarolariga zarur holatlarda istalgan vaqtda O‘zbekistonning Pekin shahridagi elchixonasiga +86 138 1120 4471 (Aziz Xilvatov), +86 135 1102 4242 (Bobur Yaxyayev),  +86 139 1175 4476 (Shuxrat Umirov) telefon raqamlari orqali hamda Shanxay shahridagi Bosh konsulxonasiga +86 131 2255 5772 (Aziz Ulug‘bekov) telefon raqami orqali murojaat qilishlari mumkinligini eslatib o‘tamiz.

Qamariddin Shayxov
Maqolaga baho bering
Baholaganlar: 103
Reyting: 3.1
Teglar
t
×