Yakkasaroyda yana daraxt mojarosi. Aybdorlar jarimaga tortildi

Bugun, 11 avgust kuni Toshkent shahri Yakkasaroy tumanidagi bir dona safora daraxti yiqildi. Bu haqda tuman hokimligi Matbuot xizmati xabar berdi.

Qayd etilishicha, Yakkasaroy tumani Kichik beshyog‘och ko‘chasida joylashgan 111-uyda qurilish kompaniyasi tomonidan olib borilayotgan qurilish ishlari jarayonida 1 dona safora daraxt ildizi qisman ochilgani uchun yiqilgan.

Huquqbuzarga Ma’muriy javobgarlik to‘g‘risidagi kodeksning 79-moddasi bilan mamuriy bayonnoma rasmiylashtirilib, 7 million 800 ming so‘m jarima belgilangan.

“Shu bilan birga, qurilish kompaniyasi mas’ullariga hududdagi mavjud daraxtlarni muhofaza qilish, ularga biotexnik tadbirlarni amalga oshirish va ekologik talablar yuzasidan tegishli ko‘rsatmalar berilib, kafolat xati olindi”, deyiladi xabarda.

Avvalroq, Yakkasaroy tumanidagi  5 tup chinor va 7 tup kashtan daraxtining ildiz qismiga qurilish kompaniyasi tomonidan shikast yetkazilgani haqida xabar bergan edik.