O‘zbekistonda korrupsiyaga xizmat qiladigan lavozimlar ro‘yxati shakllantiriladi

Vazirlar Mahkamasining “Korrupsiya darajasini reyting baholash metodikasi asosida davlat organlarida, shu jumladan hududlarda korrupsiya darajasini reyting baholash tizimini joriy etish to‘g‘risida”gi qarori loyihasi muhokamaga qo‘yildi.

Qaror loyihasiga ko‘ra:

•    keng aholi qatlami, tadbirkorlik sub’ektlari, shu jumladan O‘zbekistonda faoliyat yuritayotgan xorijiy investitsiyalar ishtirokidagi korxonalar, mahalliy va halqaro ekspertlar o‘rtasida so‘rovnomalar o‘tkaziladi;

•    so‘rovnomalar natijalarini tahlil qilish asosida davlat organlari va hududlarda korrupsiyaning tarqalganlik darajasini aniqlanadi.

Baholash natijalari asosida:

•    korrupsiyaning tarqalganlik darajasi reytingi, shu jumladan korrupsiya xavfi yuqori bo‘lgan davlat organlari va hududlar ro‘yxati shakllantiriladi;

•    baholash natijalari har yili 1 dekabrga qadar O‘zbekiston Respublikasi Oliy Majlisi palatalari, Prezident Administratsiyasi, Vazirlar Mahkamasi, Korrupsiyaga qarshi kurashish milliy kengashiga kiritiladi;

•    baholash natijalari ommaviy axborot vositalarida, davlat va xo‘jalik boshqaruvi organlari, mahalliy ijro etuvchi hokimiyat organlarining rasmiy veb-saytlarida e’lon qilinadi.