O‘zbekistonda diniy ziyoratgohlar xatlovdan o‘tkaziladi

Endi O‘zbekistondagi tashkilot va idoralarga biriktirilgan muqaddas qadamjolar va ziyoratgohlar dinlar tasnifi bo‘yicha (islomiy obidalar, yahudiylik, xristianlik, buddaviylikka oid ziyoratgohlar va boshqalar) to‘liq xatlovdan o‘tkaziladi. Bu haqda O‘zbekiston Prezidenti Shavkat Mirziyoyevning “Ichki turizm xizmatlarini diversifikatsiya qilishga oid qo‘shimcha chora-tadbirlar to‘g‘risida”gi qarorida keltirilgan.

Qarorga ko‘ra, Turizm va madaniy meros vazirligi hamda Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari Din ishlari bo‘yicha qo‘mita bilan birgalikda uch oy muddatda tashkilot va idoralarga biriktirilgan muqaddas qadamjolar va ziyoratgohlarni dinlar tasnifi bo‘yicha (islomiy obidalar, yahudiylik, xristianlik, buddaviylikka oid ziyoratgohlar va boshqalar) to‘liq xatlovdan o‘tkazadi.

Shuningdek, moddiy madaniy meros ob’ektlari ham xalqaro standartlar asosida xatlovdan o‘tkaziladi. 2022 yil 1 sentyabrga qadar respublikadagi Muqaddas qadamjolar va ziyoratgohlarning ro‘yxati shakllantiriladi va “Uzbekistan.travel” yagona milliy turistik axborot portaliga joylashtiriladi.