O‘zbekistonda bo‘ladigan boks tadbirida Mayk Tayson qatnashishi mumkin

Butunjahon boks kengashi (WBC) joriy yilning noyabr oyida O‘zbekistonda katta tadbir o‘tkazadi. Bu haqda WBC Matbuot xizmati xabar berdi.

Ma’lum qilinishicha, Butunjahon boks kengashining yillik 61-sonli Konvensiyasi 12-17 noyabr kunlari Toshkent shahrida bo‘lib o‘tadi. Kongressda hakamlar va sudyalar uchun an’anaviy seminarlar, WBC qo‘mitalari yig‘ilishlari bo‘lib o‘tadi.

“Bizning bu galgi mezbon Toshkent shahri bo‘ladi. U O‘zbekistonning iqtisodiy va madaniy markazi va butun Markaziy Osiyodagi eng boy shaharlardan biridir. Ayni mamlakatda bu sport turi jadallik bilan rivoj topib bormoqda hamda malakat aholisi boksni juda sevadi va yaxshi his qiladi”, deyiladi xabarda.

Shuningdek, 5 kun davom etadigan tadbir doirasida professional boksning har bir vazn toifasida saralaa va nomdor bokschilarning chempionlik janglari ham tashkil etiladi.

Ayrim norasmiy manbalarga ko‘ra, amerikalik boks afsonasi Mayk Tayson (58-50-2) ham mazkur tadbir mehmoni bo‘lishi va turli ko‘rgazmali chiqishlarda qatnashishi mumkin.