O‘zbekistonda benzin narxi oshishi tasdiqlandi. Qanchaga oshadi?

Avvalroq, O‘zbekistonda benzin narxi oshishi kutilayotgani haqida xabar bergan edik. “O‘zbekneftgaz” ushbu ma’lumotni tasdiqladi. 

Ma’lumki, O‘zbekiston Respublikasi Prezidentining 2022 yil 12 dekabrdagi “Kuz-qish mavsumida iste’molchilarni avtobenzin mahsulotlari bilan uzluksiz ta’minlash va ularning narxlari keskin oshishining oldini olish chora-tadbirlari to‘g‘risida”gi PQ-440-sonli qaroriga asosan, 2022 yil 10 dekabrdan 2023 yil 1 martga qadar import qilinadigan, mahalliy korxonalar tomonidan ishlab chiqariladigan va tadbirkorlik sub’ektlari tomonidan yakuniy iste’molchilarga sotiladigan AI-80 rusumli avtobenzin mahsuloti uchun aksiz solig‘i “nol” stavkada qo‘llanishi belgilangan edi.

Shuningdek, Vazirlar Mahkamasi tomonidan 2022 yil 15 dekabrda tasdiqlangan “Kuz-qish mavsumida iste’molchilarni AI-80 rusumli avtobenzin bilan uzluksiz ta’minlash va ularning narxlari keskin oshishining oldini olish” chora-tadbirlarida 2022 yil 9 dekabrdan 2023 yil 1 martga qadar “O‘zbekiston respublika tovar-xom ashyo birjasi” AJning alohida birja seksiyasi orqali AI-80 rusumli avtobenzin mahsulotini sotish narxining o‘sishi birja savdosiga chiqarish narxiga nisbatan ko‘pi bilan 5 foizgacha miqdorda belgilangan.

Natijada, 2022 yil 1-12 dekabr kunlari 1 tonna AI-80 rusumli avtobenzin uchun o‘rtacha birja narxi 8 096 ming so‘mni tashkil qilgan bo‘lsa, 13 dekabrdan boshlab 6 295 ming so‘mni tashkil qilgan yoki 1 801 ming so‘mga arzonlashdi.

O‘z o‘rnida AYOQSHlarda 1 litr AI-80 rusumli avtobenzinning narxi o‘rtacha 6 800 - 7 500 so‘mdan 5 700 – 6 000 so‘mgacha, yoki o‘rtacha 1 100 so‘mga arzonlashdi.

“Aksiz solig‘i “nol” stavkada qo‘llanishi va birja savdolarida “spred” joriy etilishi davrida (2022 yil 12 dekabr – 2023 yil 22 fevral) respublika iste’molchilariga 386 ming tonna (o‘rtacha kunlik 5 300 tonna), yoki o‘tgan yillarning mos davriga nisbatan 188,6 ming tonnaga ko‘p AI-80 rusumli avtobenzin yetkazib berildi.

2023 yil 1 martda yuqoridagi tartiblarning amal qilish muddati (imtiyozli davr) yakunlangandan keyin aksiz solig‘i hisoblanishi va birjada narxlarning erkin (o‘sish darajasi cheklanmasdan) shakllanishi hisobiga AI-80 rusumli avtobenzin narxi oshishi kutilmoqda”, deyiladi “O‘zbekneftgaz” xabarida. 

Ma’lum qilinishicha, 1 martdan boshlab birja savdolariga joylashtiriladigan 1 tonna mahalliy AI-80 rusumli avtobenzin boshlang‘ich narxi 6 863 000 so‘mdan, import avtobenzini narxi 8 036 000 so‘mdan shakllanib, birja savdolari yakuni bilan narxlar o‘rtacha 8 150 000 so‘mni (1 litr uchun 6 100 so‘m) tashkil etishi kutilmoqda.

Bunda, narxlar o‘zgarishi hisobiga “O‘zbekneftgaz” AJ tasarrufidagi AYOQSHlarda 1 litr AI-80 rusumli avtobenzinning chakana narxi mahalliy mahsulot uchun 6 800 so‘mdan, import mahsuloti uchun 7 000 so‘mdan shakllanadi.