O‘zbekiston shaxmat federatsiyasi nufuzli sovrinlar bilan taqdirlandi

BAA poytaxti Abu-Dabi shahrida Osiyo shaxmat federatsiyasi tomonidan “Asian Chess 2023” sammiti o‘tkazildi. Bu haqda O‘zbekiston shaxmat federatsiyasi matbuot xizmati xabar berdi.

Sammit doirasida 5th Annual Asian Chess Excellence Awards taqdirlash marosimi bo‘lib o‘tdi. O‘zbekiston shaxmat federatsiyasi uch nominatsiyada g‘oliblikni qo‘lga kiritdi.

Hindistonning Chennay shahrida o‘tkazilgan 44-Butunjahon shaxmat Olimpiadasida g‘olib chiqqani uchun O‘zbekiston yilning eng yaxshi terma jamoasi sifatida e’tirof etildi. Ozarbayjonning Naxchivan shahrida o‘tkazilgan Butunjahon o‘smirlar shaxmat Olimpiadasida kumush medalni qo‘lga kiritgani uchun Yilning eng yaxshi yoshlar terma jamoasi mukofoti ham O‘zbekiston shaxmat federatsiyasiga topshirildi.

O‘zbekistonlik grossmeyster Nodirbek Abdusattorov yilning eng yaxshi rapid o‘yinchisi sovrinini qo‘lga kiritdi.

Eslatib o‘tamiz, yanvar oyi yakunida o‘zbekistonlik shaxmatchilarning so‘nggi bir yil davomida xalqaro arenalardagi erishgan natijalari, sensatsion g‘alabalari ortidan O‘zbekiston – yilning eng yaxshi shaxmat mamlakati deb e’tirof etildi. Niderlandiyada o‘tkazilgan “Tata Steel Chess-2023” xalqaro turniri yakunida o‘zbekistonlik shaxmatchilar Nodirbek Abdusattorov va Javohir Sindorov yilning eng yaxshi shaxmat mamlakatiga topshiriladigan “Tour d'or” — “Oltin minora” sovrinini qabul qilib olgandi.