O‘zbekiston Quvayt bilan nimalarga kelishib oldi?

Bugun, 17 fevral kuni Al-Quvayt shahrida bo‘lib o‘tgan muzokaralar yakunida O‘zbekiston Respublikasi Prezidenti Shavkat Mirziyoyev va Quvayt Davlati Amiri Shayx Mish’al as-Saboh O‘zbekiston-Quvayt keng qamrovli sheriklik munosabatlarini rivojlantirish to‘g‘risida qo‘shma bayonot qabul qildi. Bu haqda Prezident matbuot xizmati xabar berdi.

Shuningdek, quyidagi hujjatlar imzolandi:

• Sanoat sohasidagi hamkorlik to‘g‘risida bitim;
• Havo qatnovi to‘g‘risidagi bitimga bayonnoma;
• Mehnat sohasidagi hamkorlik to‘g‘risida bitim;
• “Aqlli” shaharlarni barpo etish sohasidagi hamkorlik to‘g‘risida bitim;
• San’at va madaniyat sohasidagi hamkorlik to‘g‘risida bitim;
• Sog‘liqni saqlash sohasidagi hamkorlik to‘g‘risida bitim;
• Turizm sohasida 2025-2027 yillarga mo‘ljallangan chora-tadbirlar dasturi;
• Kuvayt arab iqtisodiy taraqqiyot jamg‘armasi bilan hamkorlik to‘g‘risida bitim.

Eslatib o‘tamiz, oldinroq, Shavkat Mirziyoyev va Shayx Mish’al as-Saboh Al-Quvayt shahridagi "Al-Bayan" saroyida tor doirada uchrashuv hamda rasmiy delegatsiyalar a’zolari ishtirokida muzokara o‘tkazgandi. Suhbat davomida O‘zbekiston bilan Quvayt o‘rtasidagi do‘stlik va ko‘p qirrali sheriklik munosabatlarini yanada rivojlantirish va mustahkamlash masalalari ko‘rib chiqilgan.