O‘zbekiston Qozog‘istonda boshlangan harbiy mashg‘ulotlarda qatnashmoqda (video)

Qozog‘istonning g‘arbiy qismidagi Mang‘istau viloyatida “Bіrlestіk-2024” xalqaro harbiy mashqlari boshlandi. Bu haqda Qozog‘iston Respublikasi mudofaa vazirligi matbuot xizmati berdi. 

Mashg‘ulotlarda Ozarbayjon, Qozog‘iston, Qirg‘iziston, Tojikiston va O‘zbekistondan harbiy kontingentlar ishtirok etmoqda.

Mudofaa vazirligi ma’lumotlariga ko‘ra, mashg‘ulotlar 8 iyuldan 17 iyulgacha davom etadi. Ular Oymasha poligonida va Tokmak burchagi yaqinidagi dengiz uchastkasida o‘tkaziladi. Besh mamlakat harbiylari “qurolli mojaroni lokalizatsiya qilish” bo‘yicha qo‘shma operatsiya o‘tkazadi. Bo‘linmalar shartli terrorchilar tomonidan bosib olingan Orolni ozod qilish, dengiz xavfsizligini ta’minlash va infratuzilmani himoya qilish bo‘yicha harakatlarni amalga oshiradi.

Qayd etilishicha, mashqlarda to‘rt mingga yaqin askar, shuningdek 700 tagacha harbiy texnika ishtirok etadi. Quruqlik va havo razvedkasi, dengiz maxsus kuchlari, artilleriya ekipajlari, hujum va tank bo‘linmalari, aviatsiya va kemalar “mojaroning lokalizatsiyasini” ishlab chiqadi.

Azizbek Eshmamatov