O‘zbekiston internet tezligi bo‘yicha dunyoda nechanchi o‘rinda turadi?

Buyuk Britaniyaning telekommunikatsiya xizmatlari provayderlarini solishtirishga ixtisoslashgan Cable.co.uk nashri hisobotiga ko‘ra, O‘zbekiston internet tezligi bo‘yicha jahonda 166-o‘rinni band qildi.

Hisobotga ko‘ra, O‘zbekistonda 5 gigabaytlik fayl o‘rtacha 6,64 Mbit/s tezlikda yuklab olinadi. Bu ko‘rsatkich bo‘yicha mamlakat 224 davlat orasida 166-o‘rinda turadi degani. Shuningdek, mamlakatda 1 Gb mobil internetning o‘rtacha narxi 4,65 dollarni tashkil qiladi.

Reytingning yuqori pog‘onasida G‘arbiy Yevropa davlatlari joy olgan. Unga ko‘ra, Jersi (Britaniya tojini tan olgan orol-davlat) 1-o‘rin (274,27 Mbit/s), Lixtenshteyn 2-o‘rin (211,26 Mbit/s), Islandiya 3-o‘rin (191,83 Mbit/s), Andorra 4-o‘rin (164,66 Mbit/s) va  Gibraltar 5-o‘rin (151,34 Mbit/s) eng yuqori tezlikdagi internetga ega davlatlar deb topilgan.

Reytingning quyi o‘rinlarida esa Turkmaniston (0,50 Mbit/s, 224-o‘rin), Yaman (0,68 Mbit/s, 223-o‘rin), Efiopiya (1,20 Mbit/s, 222-o‘rin), Gvineya-Bisau (1,24 Mbit/s, 221-o‘rin) va Ekvatorial Gvineya (1,30 Mbit/s, 220-o‘rin) mamlakatlari joylashgan. uyi pog‘onadiga davlatlarning uchtasi Sahroi Kabirda, biri Yaqin Sharqda va bittasi MDHda joylashgan.

Shuningdek, MDH mamlakatlarida o‘rtacha internet tezligi 12,87 Mbit/sni tashkil qiladi. Xususan, reytingda Rossiya (35,73 Mbit/s, 66-o‘rin), Ukraina (25,26 Mbit/s, 77-o‘rin) va Belarus (19,86 Mbit/s, 92-o‘rin) larni qayd etgan.

Sobiq Ittifoq davlatlaridan Armaniston 101-o‘rin (18,05 Mbit/s), Gruziya 112-o‘rin 13,83Mbit/s), Qirg‘iziston 155-o‘rin (7,44Mbit/s), O‘zbekiston 166-o‘rin (6,64 Mbit/s), Ozarbayjon 167-o‘rin (6,63Mbit/s), Qozog‘iston 173-o‘rin (5,83Mbit/s), Tojikiston 211-o‘rin (1,82Mbit/s), Turkmaniston 224-o‘rinni (0,50Mbit/s) egalladi.

Ma’lumot uchun, hozirda O‘zbekistonda internet foydalanuvchilarining umumiy soni 23 millionni tashkil qilmoqda.

Ozoda Choriyeva