O‘zbekiston eng kuchli armiyaga ega davlatlar orasida 18-o‘rinni egalladi

News & World Report 87 ta davlatni o‘z ichiga olgan eng kuchli armiyaga ega davlatlar ro‘yxatini tuzdi. Unda O‘zbekiston 18-o‘rinni egalladi. Bu haqda “Usnews” nashri ma’lum qildi.

Unga ko‘ra, Rossiya dunyodagi eng kuchli armiyaga ega davlat, deb topildi. 2-o‘rindan esa dunyoning yana bir giganti AQSH joy oldi. 3-o‘rin Xitoyga nasib qildi. Kuchli beshlikni Isroil va Janubiy Koreya yakunladi. 

O‘zbekiston esa ushbu ro‘yxatda Misr va Vetnamdan keyin 18-o‘rinda qayd etilgan. Bu safar mamlakat qo‘shni Qozog‘iston va Birlashgan Arab Amirliklarini ortda qoldirdi. Ushbu natija so‘nggi yillarda O‘zbekistonning harbiy salohiyati ortib borayotganini bildiradi. Xususan, 19-o‘rindan joy olgan Qozog‘iston so‘nggi ikki yilda O‘zbekistondan oldinda edi. 

Ma’lumot uchun, ro‘yxatni shakillantirishda 36 mamlakatdan 17,2 ming kishi o‘rtasida so‘rovnoma o‘tkazilgan. Har bir mamlakatni baholashda 73 ta jihat hisobga olingan.