UNICEF OAVdan bog‘chadagi dahshatli otishma suratlarini e’lon qilmaslikni so‘radi

Birlashgan Millatlar Tashkilotining Bolalar jamg‘armasi (UNICEF) Tailand shimoli-sharqidagi bolalar markazida ko‘plab bolalarning hayotiga zomin bo‘lgan otishma munosabati bilan hamdardlik bildirdi va ommaviy axborot vositalarini voqea bilan bog‘liq tasvirlarni chop etmaslikka chaqirdi. 

“UNICEF marhumlarning oilalari va jarohatlanganlarning [oilalariga] samimiy va chuqur hamdardlik bildiradi. Shuningdek, biz jamoatchilik va ommaviy axborot vositalari vakillaridan ushbu zo‘ravonlik hodisasi bilan bog‘liq tasvirlar va videolarni nashr qilish yoki yuborishdan saqlanishni so‘raymiz, chunki bu bolalar, qurbonlarning oilalari va ularning yaqinlariga salbiy ta’sir ko‘rsatishi mumkin”, deyiladi tashkilot bayonotida. 

Qayd etilishicha, UNICEF Tailand shimolidagi Nongbualampxu provinsiyasida bolalar bog‘chasida fojiali otishma sodir bo‘lganidan qayg‘uda. Bu bolalarga nisbatan zo‘ravonlik.  

“Hech bir bola hech qayerda, istalgan vaqtda zo‘ravonlik nishoni yoki guvohi bo‘lmasligi kerak”, deydi UNICEF. 

Unga ko‘ra, bolalar bog‘chalari, maktablar va barcha o‘quv maskanlari yosh bolalar uchun eng og‘ir yillarida o‘rganishi, o‘ynashi va o‘sishi uchun boshpana bo‘lishi kerak. 

Eslatib o‘tamiz, bugun, 6 oktyabr kuni Tailand shimoli-sharqidagi bolalar bog‘chasida otishma sodir etildi. Unda halok bo‘lganlar soni 36 ga yetdi. Ularning 24 nafari bolalar. Avtomat, to‘pponcha va pichoq bilan qurollangan sobiq politsiyachi bolalar markaziga bostirib kirib, o‘t ochdi, oqibatda o‘nlab odamlar halok bo‘ldi. Hujumchi qochishga uringanida, u o‘tkinchilarga qarata o‘q uzgan, oqibatda yana bir necha kishi halok bo‘lgan. Erkak oq tanli pikapda voqea joyini tark etgan, keyinchalik u uyi yonidan butunlay yonib ketgan holda topilgan, yetib kelgan huquq-tartibot idoralari xodimlari hujumchi xotini va bolasini o‘ldirishdan oldin o‘z joniga qasd qilganini aniqlagan.