UNICEF ОАВдан боғчадаги даҳшатли отишма суратларини эълон қилмасликни сўради

Бирлашган Миллатлар Ташкилотининг Болалар жамғармаси (UNICEF) Таиланд шимоли-шарқидаги болалар марказида кўплаб болаларнинг ҳаётига зомин бўлган отишма муносабати билан ҳамдардлик билдирди ва оммавий ахборот воситаларини воқеа билан боғлиқ тасвирларни чоп этмасликка чақирди. 

“UNICEF марҳумларнинг оилалари ва жароҳатланганларнинг [оилаларига] самимий ва чуқур ҳамдардлик билдиради. Шунингдек, биз жамоатчилик ва оммавий ахборот воситалари вакилларидан ушбу зўравонлик ҳодисаси билан боғлиқ тасвирлар ва видеоларни нашр қилиш ёки юборишдан сақланишни сўраймиз, чунки бу болалар, қурбонларнинг оилалари ва уларнинг яқинларига салбий таъсир кўрсатиши мумкин”, дейилади ташкилот баёнотида. 

Қайд этилишича, UNICEF Таиланд шимолидаги Нонгбуалампху провинциясида болалар боғчасида фожиали отишма содир бўлганидан қайғуда. Бу болаларга нисбатан зўравонлик.  

“Ҳеч бир бола ҳеч қаерда, исталган вақтда зўравонлик нишони ёки гувоҳи бўлмаслиги керак”, дейди UNICEF. 

Унга кўра, болалар боғчалари, мактаблар ва барча ўқув масканлари ёш болалар учун энг оғир йилларида ўрганиши, ўйнаши ва ўсиши учун бошпана бўлиши керак. 

Эслатиб ўтамиз, бугун, 6 октябрь куни Таиланд шимоли-шарқидаги болалар боғчасида отишма содир этилди. Унда ҳалок бўлганлар сони 36 га етди. Уларнинг 24 нафари болалар. Автомат, тўппонча ва пичоқ билан қуролланган собиқ полициячи болалар марказига бостириб кириб, ўт очди, оқибатда ўнлаб одамлар ҳалок бўлди. Ҳужумчи қочишга уринганида, у ўткинчиларга қарата ўқ узган, оқибатда яна бир неча киши ҳалок бўлган. Эркак оқ танли пикапда воқеа жойини тарк этган, кейинчалик у уйи ёнидан бутунлай ёниб кетган ҳолда топилган, етиб келган ҳуқуқ-тартибот идоралари ходимлари ҳужумчи хотини ва боласини ўлдиришдан олдин ўз жонига қасд қилганини аниқлаган.