Ukrainadagi vaziyatni yumshatishga hissa qo‘sha olmayapman – Ilon  Mask

Amerikalik milliarder Ilon Mask kecha, 15 oktyabr kuni Ukraina atrofidagi vaziyatdagi keskinlikni kamaytirishga qaratilgan barcha urinishlari behuda bo‘lganini aytdi, deb yozmoqda TASS.

“Vaziyatni yumshatish uchun bor kuchim bilan harakat qilyapman, lekin aftidan, bu borada hech bir muvaffaqiyatga erishmadim”, deb yozdi u Twitter’da.

Mask uning SpaceX kompaniyasi Starlink’ning Ukrainadagi sun’iy yo‘ldoshli aloqa tizimini ta’minlashda davom etishini aytdi, ammo kompaniya Pentagondan xarajatlar uchun pul to‘lash va tizim faoliyatini moliyalashtirishni so‘rab murojaat qildi.

Eslatib o‘tamiz, Mask 15 oktyabr  kuni ijtimoiy tarmoqdagi sahifasida "operatsiya SpaceX uchun hozirgacha 80 million dollarga tushgani va yil oxirigacha xarajatlar 100 million dollardan oshishi" haqida yozgan edi.

Milliarder SpaceX kompaniyasi mavjud tizimni cheksiz vaqtgacha ta’minlab, minglab qo‘shimcha terminallarni jo‘natishda davom eta olmasligini, bu aqlga sig‘masligi haqida ogohlantirgan edi.

Mask bir necha kun oldin Ukrainada tinchlikka erishish uchun o‘zining takliflarini ilgari surdi. Birinchi qadam sifatida u yaqinda Rossiya tomonidan anneksiya qilingan hududlarda BMT nazorati ostida referendumlar o‘tkazishni taklif qildi. Tadbirkorning so‘zlariga ko‘ra, Qrim rasman Rossiya Federatsiyasi tarkibiga kiradi, Ukraina esa neytral maqomini e’lon qilishi mumkin. Maskning taklifiga javoban, Ukrainaning Germaniyadagi elchisi Andriy Melnik ingliz tilida “behayo iborani” tilga oldi va unga “ortga chekinishni” maslahat berdi.

Musulmon Ziyo