U menga ishongan birinchi odam edi – Maxachev 

Yengil vazn toifasida UFC kamarini qo‘lga kiritgan rossiyalik jangchi Islom Maxachev 2020 yil iyul oyida vafot etgan murabbiyi Abdulmanap Nurmuhamedov haqida so‘z ochdi.

“Endigina zalga borganimda va jangchi bo‘lish haqida hali o‘ylamaganimda murabbiyim birinchi bo‘lib menga ishongan inson edi. O‘zgacha emas edim, boshqalardan farqim yo‘q edi, lekin butun faoliyatim davomida u menga ishondi va chempion bo‘lishim uchun, faqat mashg‘ulot o‘tkazishim kerakligini aytdi. Bugun chempionman, kamarimni murabbiyimga taqib qo‘yishni juda xohlardim. Agar, murabbiyim yonimda bo‘lganida g‘alabam yanada qadrli bo‘lardi. Yaratgan ustozimning joyini jannatdan qilsin”, deb yozdi Maxachev o‘z sahifasida.

Ma’lumot uchun, Islom Maxachev UFC 280 promoushenida braziliyalik Charlz Oliveyrani mag‘lubiyatga uchratib, yengil vazn toifasi reytingida yetakchiga aylandi. 

Maxachev keyingi jangini UFC 284 doirasida P4P reytingi yetakchisi avstraliyalik Aleks Volkanovskiga qarshi o‘tkazishi kutilmoqda.

Shaxzod Shukurov