“Turkiyalik Messi” “Barselona”ga o‘tishga yaqin turibdi

Ispaniyaning “Barselona” klubi Turkiyaning “Fenerbaxche” jamoasidan 18 yoshli yarim himoyachi Arda Gulerni o‘z safiga qo‘shib olmoqchi. Bu haqda futbol jurnalisti Nikola Skira o‘z Twitter sahifasida ma’lum qildi.

Qayd etilishicha, “Barselona” tez orada transferni yakunlaydi, ammo futbolchini “Fenerbaxche”da yana bir mavsum ijarada qoldiradi.

Arda Guler o‘tgan mavsumda “Fenerbaxche” safida barcha musobaqalarda 35 ta o‘yinda maydonga tushib, 6 ta gol urdi. U milliy chempionat o‘yinlarida 4 ta gol va xuddi shuncha golli uzatma muallifiga aylandi.

Guler “Fenerbaxche” safida Turkiya kubogini qo‘lga kiritgan. “Transfermarkt”ga ko‘ra, uning narxi 15 million yevroni tashkil etadi. 

Ta’kidlash joiz, Gulerning o‘yin uslubi argentinalik futbolchi Lionel Messiga o‘xshagani bois bir qator ommaviy axborot vositalari 18 yoshli futbolchini “turkiyalik Messi” deb, atamoqda. Uning amaldagi klubi bilan shartnomasi 2025 yilgacha mo‘ljallangan.