Turkiyaga yana tabiiy ofat yopirildi: Uylar osmonga “uchdi” (video)

Bugun, 20 aprel kuni Turkiyaning Qahramonmarash viloyatida bo‘ron sodir bo‘lib, 40 ga yaqin odam jarohat oldi. Bu haqda Qahramonmarashda zilzila qurbonlariga yordam ko‘rsatish bo‘yicha sa’y-harakatlarni muvofiqlashtiruvchi viloyat gubernatori Bulent Tekbiyiyk o‘g‘lu ma’lum qildi.

“Gap 40 nafar jarohatlanganlar haqida ketmoqda, ulardan 8 nafarining ahvoli og‘ir. Zilzilada boshpanasiz qolganlar uchun o‘rnatilgan 170  ta konteyner-uyni dovul uchirib yuborgan. Biz odamlarni kun davomida boshqa konteynerlarga joylashtirishni rejalashtirmoqdamiz”, deydi Tekbiyiyk o‘g‘lu.

Uning so‘zlariga ko‘ra, bo‘ron avtomobillarni, konteyner-uylarni ag‘darib yuborgan, uylarning tomlarini yulib, yuzlab metrlar nariga olib ketgan.

Ayniqsa, fevral oyidagi zilzilalardan birining epimarkazi bo‘lgan Pazarchik aholi punkti yomg‘ir bilan birga kelgan bo‘ronli shamoldan ko‘p zarar ko‘rgan.