Turkiyadagi o‘zbekistonlik futbolchilar soni ko‘paydi

O‘zbekiston milliy terma jamoasi a’zosi va “Nasaf” klubi futbolchisi Husniddin Aliqulov faoliyatini Turkiyaning “Rizespor” jamoasida davom ettiradi. Bu haqda klub rasmiy saytida ma’lum qilindi. 

Qayd etilishicha, bugun, 5 avgust kuni o‘zbekistonlik 24 yoshli futbolchi Turkiya Superligasi klubi bilan 3+1 ko‘rinishida shartnoma imzolagan. Ya’ni, u 3 yillik kelishuv muddatini yana 1 yilga uzaytirish huquqiga ega. 

“Husniddin Aliqulovga xush kelibsan deymiz va omad tilaymiz”, deyiladi klub xabarida.

Ma’lumot uchun, Aliqulov O‘zbekiston Superligasining 12 ta o‘yinida 5 ta gol urib, “Nasaf” to‘purari bo‘lib turgandi. Turkiyaning “Rizespor” klubi Rize shahri jamoasi bo‘lib, 2020/2023 yilgi mavsumda mamlakat Superligasida ishtirok etadi. Klub uy o‘yinlarini 15 ming tomoshabinga mo‘ljallangan “Yeni Rize Shehir” stadionida o‘tkazadi.

Eslatib o‘tamiz, kecha, 4 avgust kuni O‘zbekiston milliy terma jamoasi a’zosi Abbosbek Fayzullayev Rossiyaning SSKA klubi bilan 2025/2026 yilgi mavsum oxiriga qadar shartnoma imzolagan edi. Shuningdek, moskvaliklarda bitimni yana bir yilga uzaytirish huquqi mavjud.