Tramp “Yil odami” deb topildi

Amerikaning “Time” jurnali AQSHning saylangan prezidenti Donald Trampni “Yil odami” deb topdi.

“Yil odami” nominatsiyasiga jami o‘n kishi nomzod bo‘ldi. Bular:

• AQSHning saylangan prezidenti Donald Tramp;
• Jo Bayden poygadan chiqib, Trampga yutqazib qo‘yganidan so‘ng davlat rahbari lavozimi uchun kurashga kirgan AQSH vitse-prezidenti Kamola Harris;
• SpaceX va Tesla asoschisi, AQSH yangi prezident ma’muriyatida o‘rin olgan milliarder biznesmen Ilon Mask;
• Bu yil saraton kasalligiga chalingan va kimyoterapiyadan o‘tgan Uels malikasi Keyt Middleton;
• Aleksey Navalniyning bevasi Yuliya Navalnaya;
• Isroil Bosh vaziri Binyamin Netanyaxu;
• AQSH Federal zaxira raisi Jerom Pauell;
• Amerikalik komediyachi va podkast boshlovchisi Jo Rogan;
• Meksika tarixidagi birinchi ayol Prezident Klaudiya Sheynbaum;
• Meta bosh direktori Mark Sukerberg.

Qayd etish joiz, nomzodlar orasidagi Sukerberg (2010), Tramp (2016), Harris (2020; Bayden bilan birga) va Mask (2021) oldin ham “Yil odami” sifatida tanlangan. 2022 yilda unvon “Ukraina ruhi” va mamlakat Prezidenti Vladimir Zelenskiyga nasib etdi. 2023 yilda “Time” jurnali amerikalik qo‘shiqchi Teylor Sviftni “Yil odami” sifatida tanladi.

“Time” – 1923 yildan beri nashr etiladigan Amerika jurnali. Nashrning barcha platformalardagi umumiy auditoriyasi 2023 yil mart holatiga ko‘ra, 100 million kishidan oshdi. 1927 yildan beri jurnal o‘zining dekabr sonida yil odamini e’lon qiladi va uning suratini muqovaga qo‘yadi. Muayyan shaxsdan tashqari, u odamlar guruhi yoki tushunchasi ham bo‘lishi mumkin. Qaror tahririyat tomonidan qabul qilinadi. Unga ko‘ra, unvonni oluvchi so‘nggi 12 oy ichida dunyoga sezilarli ta’sir ko‘rsatgan bo‘lishi kerak – va bu ijobiy bo‘lishi shart emas.

Yillar davomida Maxatma Gandi, Adolf Gitler, Iosif Stalin, Uinston Cherchill, Martin Lyuter King, chaqaloq boomers, Apollon 8 astronavtlari, shaxsiy kompyuter, Mixail Gorbachev, Bill Klinton, Jeff Bezos, shuningdek, Rossiya Prezidenti Vladimir Putin ham “Yil odami” bo‘lgan.