Tramp va Starmer Putinga bosimni davom ettirishga kelishib oldi 

London va Vashington Ukrainadagi urush davom etayotgan bir paytda G‘arb ittifoqchilari Rossiya Prezidenti Vladimir Putinga jamoaviy bosim o‘tkazishda davom etishi kerak degan fikrga kelishdi. Bu haqda Buyuk Britaniya hukumati matbuot xizmatining kecha, 30 mart kuni kechqurun Bosh vazir Kir Starmer va AQSH Prezidenti Donald Tramp o‘rtasidagi bo‘lib o‘tgan telefon suhbati yakunlari bo‘yicha bayonotida so‘z boradi. 

“Yetakchilar Putinga jamoaviy bosimni davom ettirish zarurligi haqida kelishib oldi. Ular yaqin kunlarda aloqada bo‘lishga ham kelishdi”, deyiladi bayonotda.

Ma’lum qilinishicha, Starmer Trampga yaqinda Parijda bo‘lib o‘tgan “ko‘ngillilar koalitsiyasi” (Ukraina xavfsizligi kafillari sifatida harakat qilishga tayyor davlatlar) yig‘ilishidagi “samarali muhokamalar” haqida ma’lum qilgan.

27 mart kuni Parijda “ko‘ngillilar koalitsiyasi” sammiti bo‘lib o‘tdi. Unda 31 davlat, shuningdek, Yevropa Ittifoqi va NATO vakillari ishtirok etdi. Ushbu uchrashuv natijasida Kiyevga harbiy, moliyaviy va energetik yordamni oshirish, shuningdek, Rossiyaga qarshi mudofaa urushi olib borayotgan mamlakatni tiklashga ko‘maklashish haqida e’lon qilindi.

Sammit ishtirokchilari Ukrainaga qo‘shimcha 17 milliard yevro harbiy yordam berishga, Kiyevga 2 million dona artilleriya o‘q-dorilari yetkazib berishga va Yevropa Ittifoqiga a’zo davlatlar ko‘rsatayotgan yordam Ukraina ehtiyojlariga mos kelishini ta’minlash uchun o‘zaro muvofiqlashtirishni yaxshilashga va’da berishdi.

Bundan tashqari, Yevropa yetakchilari Ukraina mudofaa sanoati bilan hamkorlikni mustahkamlash va Ukraina askarlarini harbiy tayyorgarlik bo‘yicha YeI missiyasini rivojlantirishni davom ettirishga kelishib oldi.

Eslatib o‘tamiz, oldinroq Donald Tramp Vladimir Putin Ukraina yetakchisi Vladimir Zelenskiy rahbariyatining ishonchliligini tanqid qilganida “juda g‘azablangani” va “jahli” chiqqanini aytgan va Rossiyaga bojlar bilan tahdid qilgandi.