Tramp razvedka ma’lumotlarini Ukrainaga bermoqchi

north_east

Yevropani Rossiyadan faqat Ukraina himoya qila oladi – FT

AQSH Prezidenti Donald Tramp Rossiya energetika ob’ektlariga zarba berish uchun razvedka ma’lumotlarini Ukrainaga o‘tkazishga ruxsat berdi. Bu haqda “The Wall Street Journal” xabar berdi.

Nashr manbalarining aytishicha, razvedka idoralari va Pentagon neftni qayta ishlash zavodlari, quvurlar, elektr stansiyalari va boshqa infratuzilmalarni vayron qilish uchun ma’lumotlarni taqdim etishi kerak. Tramp bu buyruqni o‘zining Truth Social sahifasida Ukraina urushda g‘alaba qozonishi va o‘z hududini qaytarib olishi mumkinligi haqida yozishidan sal avval chiqargan. Ular, shuningdek, Vashington NATO ittifoqchilaridan Kiyevga xuddi shunday yordam ko‘rsatishni so‘raganini qo‘shimcha qildi.

Bundan tashqari, WSJ manbalariga ko‘ra, Tramp ma’muriyati Kiyevni “Rossiyadagi nishonlarga ko‘proq zarba berishga imkon beradigan kuchli qurollar” bilan ta’minlash imkoniyatini ko‘rib chiqmoqda. Bu uzoq masofali Tomahawk va Barracuda raketalariga tegishli. Avvalroq AQSH vitse-prezidenti Jeyms Devid Vens Oq uy Ukrainaga 2500 kilometr masofaga ucha oladigan Tomahawk raketalarini taqdim etish masalasini muhokama qilayotganini, biroq Tramp bu qarorni hali ma’qullamaganini aytgandi. Rossiya Prezidenti Vladimir Putin avvalroq ta’kidlaganidek, Rossiyaga zarba berish uchun G‘arbning uzoq masofali qurollaridan foydalanish “NATO davlatlari, AQSH va Yevropa davlatlari Moskva bilan urush holatida ekanini anglatadi”.

Putinning ta’kidlashicha, Ukraina o‘z-o‘zidan bunday zarbalarni amalga oshirishga qodir emas, ular faqat G‘arb davlatlarining yordami bilan qilinishi mumkin.

O‘z navbatida, Ukraina Prezidenti Vladimir Zelenskiy sentyabr oyining oxirida Tramp bilan uchrashuvdan so‘ng Kreml rasmiylariga AQSHning uzoq masofali qurol-yarog‘ zarbalari bilan tahdid qilgan edi.

“Ular bomba boshpanalari qayerda ekanini bilishi kerak. Bu ularga kerak. Agar urushni to‘xtatmasalar, baribir ularga kerak bo‘ladi”, degan edi Zelenskiy.

Ukraina avvalroq AQSHdan Tomahawk raketalarini talab qilgan edi. Bu so‘rov Zelenskiy o‘tgan yili sobiq prezident Jo Baydenga taqdim etgan “G‘alaba rejasi”ning maxfiy ilovasida keltirilgan. Biroq Kiyev bu raketalarni hech qachon olmagan. Iyul oyida, “Financial Times” ma’lumotlariga ko‘ra, Ukraina yana AQSHdan shunga o‘xshash qurollarni so‘ragan, ammo ularni ham olmagan. Bungacha Tramp ma’muriyati Kiyevning Rossiyaga zarba berish uchun uzoq masofali raketalardan, jumladan, ATACMS’dan foydalanishiga to‘sqinlik qilgan edi.