Tojikiston sodiq do‘stimiz, davr sinovidan o‘tgan ishonchli strategik sherigimiz – Mirziyoyev

O‘zbekiston Respublikasi Prezidenti Shavkat Mirziyoyev va Tojikiston Respublikasi Prezidenti Imomali Rahmonning muzokaralari ikki mamlakat delegatsiyalari ishtirokida kengaytirilgan tarkibda davom etdi.

O‘zbekiston rahbari ko‘p qirrali hamkorlikning barcha yo‘nalishlarida ulkan muvaffaqiyatlarga erishilganini katta mamnuniyat bilan qayd etib, “Tojikiston bizning yaqin qo‘shnimiz, sodiq do‘stimiz, davr sinovidan o‘tgan ishonchli strategik sherigimiz”, deb ta’kidladi. 

Prezident Mirziyoyev o‘zaro manfaatli va har tomonlama hamkorlikni mamlakatlar va xalqlar manfaatli yo‘lida bundan buyon ham mustahkamlashga tayyorligini bildirdi.

“Keyingi yillarda ikki tomonlama hamkorlik sezilarli darajada faollashdi. Tovar ayirboshlash qariyb 40 barobarga ko‘payib, 600 million dollarga yetdi. Qo‘shma korxonalar soni 10 karra oshdi.

Kuni kecha o‘tgan Hukumatlararo komissiya yig‘ilishi va biznes forumning muvaffaqiyatli natijalari – 1 milliard dollarlik yangi bitim va shartnomalar imzolangani mamnuniyat bilan qayd etildi”, deyiladi O‘zbekiston Prezidenti Matbuot xizmati tarqatgan xabarda. 

Qayd etilishicha, ikki davlat poytaxtlari Toshkent va Dushanbe shaharlari, Surxondaryo va Xatlon viloyatlari hamda Toshkent, Farg‘ona, Samarqand va So‘g‘d viloyatlari o‘rtasida samarali aloqalar yo‘lga qo‘yilgan. Mazkur tashrif doirasida hamkorlik bo‘yicha “yo‘l xaritasi”ni Jizzax va So‘g‘d viloyatlari ham qabul qiladilar.

Prezidentlar birodar mamlakatlar o‘rtasidagi iqtisodiy sheriklik ustuvor ahamiyatga ega ekanini, savdo hajmi va nomenklaturasini karrasiga oshirish uchun katta salohiyat mavjudligini ta’kidlagan.

Mashinasozlik, elektrotexnika, to‘qimachilik, charm, farmatsevtika, oziq-ovqat, agrosanoat, tog‘-kon, metallurgiya va boshqa tarmoqlarda loyihalarni amalga oshirish uchun katta istiqbollar borligi qayd etilgan.

O‘zbekiston-Tojikiston investitsiya kompaniyasi salohiyatini faol ishga solish orqali hududlararo va sanoat kooperatsiyasi loyihalarini amalga oshirish dolzarbligi ko‘rsatib o‘tilgan.

Madaniy-gumanitar hamkorlikni mustahkamlash to‘g‘risida kelishuvlarga erishilgan. Prezidentlar fan, ta’lim, san’at, kino va turizm sohalaridagi hamkorlikka e’tibor qaratish zarurligini ta’kidlaganlar. Yoshlarning intellektual salohiyatini rivojlantirish va ma’naviyatini yuksaltirish ustuvor yo‘nalish sifatida qayd etilgan.