Toshkentdagi chorrahalarda “vafel chizmasi” paydo bo‘ldi

Jamiyat 8812
image

Poytaxt Toshkentda Singapur tajribasini qo‘llagan holda, bir necha chorrahalarda yotqizilgan yangi yo‘l chizmasi paydo bo‘ldi. “Vafel chizmasi” deb nomlanayotgan ushbu yangi yo‘l chizmasi orqali poytaxtdagi tirbandlikka berham berish nazarda tutilmoqda.  

“Chizma yordamida harakat yo‘nalishida tirbandlik yuzaga chiqqan holatda chiqish mumkin bo‘lmagan hudud belgilab olinadi va haydovchi to‘xtashga majbur bo‘ladi. “Vafel chizmasi” YHQ bilan belgilangan ba’zi holatlarda o‘ng yoki chap tomonga burilishni taqiqlamaydi.

Chizma parallel kesishadigan sariq rangli diagonal chiziqlardan hosil bo‘lgan kataklar ko‘rinishiga ega. “Vafel chizmasi” mustaqil tarzda hamda chorrahaga yaqinlashish haqida ogohlantiruvchi yo‘l belgisi bilan birga qo‘llanilishi mumkin”, deyiladi Toshkent shahar IIBB xabarida. 

Hozirgi vaqtda sariq rangli kataklar Nukus ko‘chasining Bobur, Abdulla Qahhor, Glinka, Beshyog‘och, Mirobod, Avliyo-Ota, Afrosiyob ko‘chalari bilan kesishmasida – jami yettita chorrahalarda chizilgan. 

Sinov tariqasida chizilayotgan chizma tirbandliklar ko‘p uchrab turadigan boshqariladigan chorrahalarda qo‘llaniladi. Yaqin kunlarda poytaxtning yana 18 ta chorrahalarida, ya’ni quyidagi ko‘chalar kesishmalarida “vafel chizmalari”ni tashkil etish rejalashtirilmoqda: Nukus – Taras Shevchenko, Nukus – Amir Temur, Nukus – Istiqbol, Mustaqillik – Oqqo‘rg‘on, Mustaqillik – Sayram (7-yo‘l), Mirzo-Ulug‘bek – Do‘rmon yo‘li, Do‘rmon yo‘li – Mingbuloq, Do‘rmon yo‘li – G‘azalkent, Do‘rmon yo‘li – Temur Malik, Mustaqillik – Shastri, Mustaqillik – Shahrisabz, Shahrisabz – Amir Temur, Alisher Navoi – Zarafshon, Sharof Rashidov – Alisher Navoi, Sharaf Rashidov – Matbuotchilar, Sharaf Rashidov – Afrosiyob, Fidoilar – Afrosiyob, Shahrisabz – Afrosiyob.

Rejalashtirilgan ishlar yakunlangach, Toshkentdagi qamralgan chorrahalarning umumiy soni 25 tani tashkil etadi.

Eslatib o‘tamiz, (O‘zbekiston Respublikasi Vazirlar Mahkamasining “Yo‘l harakati qoidalarini tasdiqlash to‘g‘risida”gi Qarori) “Chorrahada harakatlanish” bobidagi 97-bandga muvofiq, “Haydovchi tirbandlik tufayli majburiy to‘xtab, ko‘ndalang yo‘nalishdagi transport vositalarining harakatlanishiga to‘sqinlik tug‘diradigan bo‘lsa, chorraha yoki qatnov qismlari kesishmasiga kirishi taqiqlanadi”.

Ammo hozirgi vaqtda bayonnomalarni rasmiylashtirish ko‘zda tutilmayapti: haydovchilarga chizmaning talablarini o‘rganib chiqish uchun vaqt va unga ko‘nikish uchun imkoniyat beriladi.
 

Qalampir.uz Tahririyati
Maqolaga baho bering
Baholaganlar: 135
Reyting: 3.1
t
×
×