Toshkentda o‘zbek-turk unversitetini ochish rejalashtirilyapti

Turkiya va O‘zbekiston qo‘shma universitet tashkil etadi. Bu haqda Turkiya Oliy ta’lim kengashi (YÖK) rahbari Erol O‘zvar xabar berdi. 

O‘zvar Turkiya O‘zbekiston bilan oliy ta’lim sohasidagi aloqalarni kengaytirishga ahamiyat berishini ta’kidladi.

Kengash rahbarining so‘zlariga ko‘ra, hozirgi kunda Turkiya oliy o‘quv yurtlarida 2500 nafar o‘zbekistonlik talaba tahsil olmoqda.

Uning so‘zlariga ko‘ra, tegishli hamkorlik har ikki tomon uchun ham foyda keltiradi.

“Shu nuqtai nazardan, Oliy ta’lim kengashi hamda O‘zbekiston Oliy va o‘rta maxsus ta’lim vazirligi Turkiya oliy ta’limi tajribasini do‘st va qardosh O‘zbekiston xalqi bilan bo‘lishish maqsadida O‘zbekiston – Turkiya universitetini tashkil etishni rejalashtirmoqda”, deydi u. 

O‘zvarning qo‘shimcha qilishicha, O‘zbekiston bilan oliy ta’lim sohasida hamkorlik faqat qo‘shma universitet yaratishdan iborat emas. 

“O‘zbekistonga tashrifimiz doirasida Turkiya va O‘zbekiston o‘rtasida oliy ta’lim sohasida yangi qirralarni ochmoqdamiz. Ikki davlat rahbarlarining topshirig‘iga ko‘ra bu yerda O‘zbek-turk universitetini tashkil etishni rejalashtirganmiz”, deydi u.