Toshkentda quvur sexi yonib ketdi (video)

Bugun, 11 sentyabr kuni Toshkent shahri, Yakkasaroy tumanida joylashgan plastmassa quvur sexida yong‘in chiqdi. Bu haqda Favqulodda vaziyatlar vazirligi xabar berdi.

Qayd etilishicha, soat 12:40 da Toshkent shahar Yakkasaroy tumani, Qushbegi ko‘chasida joylashgan plastmassa quvurlarini ishlab chiqarish sexida yong‘in sodir bo‘lgani to‘g‘risida FVBga xabar tushgan.

Shunga ko‘ra, yong‘in-qutqaruvchilar soat 12:46 da hodisa joyiga yetib borib, yong‘in soat 13:08 da qurshab olingan va soat 13:15 da o‘chirilgan.

Dastlabki ma’lumotlarga ko‘ra, tan jarohati olganlar to‘g‘risida xabar tushmagan. Voqea joyiga Favqulodda vaziyatlar vaziri, Toshkent shahar FVB boshlig‘i yetib borgan.

Eslatib o‘tamiz, avvalroq Surxondaryo viloyati, Uzun tumanidagi bozorda joylashgan oziq-ovqat mahsulotlari savdo nuqtasida yong‘in chiqqani haqida xabar berilgan edi. Hodisa oqibatida tan jarohati olganlar bo‘lmagan.