Toshkentda avtobus va metroda yo‘lkira narxi oshirilmoqda

2022 yilning 1 yanvaridan Toshkentda avtobus va metropolitenda yo‘lkira narxi oshirilmoqda. Bu haqda Toshkent shahar hokimining “Yangi tariflar joriy qilinishi to‘g‘risida”gi qarori loyihasida ko‘zda tutilgan.

Qarorga ko‘ra, 1 yanvardan Toshkent shahri hududida shahar yo‘lovchilar transporti - avtobus va metropolitenda qatnovlar amalga oshirish uchun cheklangan tariflar:

a) bir yo‘lovchi uchun – 1 700 (bir ming yetti yuz) so‘m;

b) bir yo‘lovchining bagajini tashish bo‘yicha xizmat uchun - 3 000 (uch ming) so‘m etib belgilanadi.

Qarorda keltirilishicha, yo‘lkira haqi yig‘ilishida shaffoflikning ta’minlanishi shahar jamoat transportida naqd pul orqali to‘lovlarni amalga oshiruvchi yo‘lovchilar soni kamayishi evaziga transport kartalaridan foydalanuvchilarning soni va ulardan tushadigan mablag‘larning keskin o‘sishiga, ular tomonidan cheklangan tariflar asosida ko‘riladigan zararlar miqdorining kamayishiga olib keladi.

2022 yilda yangi tariflarning joriy etilishi natijasida, dastlabki hisob-kitoblarga binoan, “Toshshahartransxizmat” AJ tizimidagi avtobus saroylari hamda “Toshkent metropoliteni” UKning kutilayotgan umumiy zarari miqdori kamayishi evaziga shahar mahalliy byudjetida 128-130 mlrd so‘m miqdorida mablag‘lar tejalishi kutilmoqda.