Toshkentda avtobus haydovchisi va yo‘lovchi o‘rtasida janjal yuz berdi (video)

Ijtimoiy tarmoqlarda avtobus haydovchisi va yo‘lovchilar o‘zaro tortishayotgani aks etgan video tarqalib, keng muhokamalarga sabab bo‘ldi. Holat yuzasidan “Toshshahartransxizmat” aksiyadorlik jamiyati munosabat bildirdi.

Joriy yilning 25 sentyabr kuni soat 19:59 da 93-sonli avtobus yo‘nalishi haydovchisi A.G‘. boshqaruvida bo‘lgan avtobus salonidagi yo‘lovchi haydovchidan belgilanmagan joyda avtobusni to‘xtatishni so‘ragan. Haydovchi to‘xtay olmasligini bildirgan. Shundan so‘ng, yo‘lovchi haydovchiga haqoratli so‘zlar aytgan. 

Shuningdek, yo‘lovchi tomonidan avtobus boshqaruviga xalaqit berilgani, tortishuv oqibatida yo‘lovchi va unga hamrohlik qilayotgan ayol avtobusdan tushib, uning old tomoniga turib olib 15 daqiqa davomida harakatlanishga to‘sqinlik qilgani aniqlangan. Hozirda voqea yuzasidan qo‘shimcha o‘rganish ishlari olib borilmoqda.

“Hurmatli yo‘lovchilar! Jamoat transportida harakatlanish qoidalariga amal qilishingizni va yuqoridagi kabi holatlarga guvoh bo‘lganingizda “Toshshahartransxizmat” AJning 1062 ishonch raqamiga murojaat qilishingizni iltimos qilamiz”, deyiladi xabarda.