Toshkent: qidiruvda bo‘lgan hamda giyohvandlik vositasi olib yurganlar qo‘lga tushdi 

Yo‘l harakati xavfsizligi Bosh boshqarmasi Matbuot xizmati kecha, 25 sentyabr kuni Toshkent shahrida yonida giyohvand modda olib yurgan hamda qidiruvda bo‘lgan shaxslar qo‘lga tushgani haqida ma’lumot berdi. 

Ma’lum qilinishicha, Chilonzor tumanida joylashgan “Erkin” YPX maskanida Spark rusumli avtomobil to‘xtatilib tekshirilganda 1988 yilda tug‘ilgan haydovchi Sh.B. ko‘rinishi va turli xatti-harakatlari bilan YPX xodimlarda shubha uyg‘otgan. Xolis va guvohlar ishtirokidagi tekshiruvlar davomida avtomobil old o‘rindig‘ining chap yonidan shokolad qog‘oziga solingan, paketga o‘ralgan, jigar rangli, o‘tkir hidli saqichsimon modda topilgan.

Xabarga ko‘ra, mazkur holat yuzasidan tegishli hujjatlar rasmiylashtirilib, haydovchi Sh.B. va topilgan modda Chilonzor tumani IIO FMBga topshirilgan.

Bundan tashqari, Chilonzor tumanida 2021 yil 13 avgustdan buyon qidiruvda bo‘lgan shaxs ushlangan. Soat 18:00 da Captiva rusumli avtomobil to‘xtatilib, tekshirilganda 1985 yilda tug‘ilgan haydovchi Ya.M. O‘zbekiston Respublikasi Jinoyat kodeksining 168-moddasi 2-qismi bilan ayblanib, qidiruvda ekanligi aniqlangan.

Mazkur holat yuzasidan tegishli hujjatlar rasmiylashtirilib, haydovchi Ya.M. Chilonzor tumani IIO FMB JQBga topshirilgan.

Shuningdek, soat 16:30 da Bektemir YPX maskanida 1983 yilda tug‘ilgan haydovchi Q.J. boshqaruvidagi Mercedes-Benz rusumli avtomobil to‘xtatilib tekshirilganda haydovchining xatti-harakatlari YPX xodimlarida shubha uyg‘otgan. Xolis va guvohlar ishtirokidagi tekshiruv davomida haydovchining hamyonidan jigar rangli, o‘tkir hidli, kukunsimon modda topilgan.