Rasman: Koronavirus O‘zbekistonga ham kirib keldi

Dunyoning 160 ga yaqin davlatiga kirib borgan koronavirus O‘zbekistonni ham chetlab o‘tmadi

Bugun, 15 mart kuni soat 06:00 da Respublika Virusologiya instituti laboratoriyasida Fransiya Respublikasida bo‘lib qaytgan 1 nafar O‘zbekiston fuqarosida COVID-19 koronavirus infeksiyasi aniqlandi.

Hozirda epidemiologik surishtiruv hamda kasallikni tarqalib ketmasligi uchun profilaktik chora-tadbirlar to‘liq amalga oshirilmoqda.

Ushbu holat yuzasidan qo‘shimcha ma’lumot taqdim etiladi.

Ma’lumot o‘rnida, O‘zbekistonga 14 mart kuni xalqaro aeroportlar orqali 38 ta reysda – 4 800 nafar, temir yo‘llar orqali – 1 860 nafar, qolgan chegara-bojxona postlaridan 38 ming nafar fuqarolar kirib keldi, barcha yo‘lovchilar SKPlarda termometriya hamda birlamchi tibbiy tekshiruvdan o‘tkazildi. 

Epidemik vaziyat noxush bo‘lgan davlatlarda bo‘lib qaytgan 7 781 nafar fuqarolar uy sharoitida tibbiy kuzatuvga olingan. Ulardan 5,6 ming nafarida kasallikni yashirin davri yakunlangani uchun tibbiy kuzatuvdan olingan. Bugungi kunda 2 100 nafar fuqarolar salomatligi ustidan tibbiy kuzatuv davom etmoqda.

Ma’lumot uchun, dunyo bo‘yicha 156 740 kishi koronavirusga chalingan, ularning 5839 nafari vafot etgan, 75 935 nafari kasallikdan forig‘ bo‘lgan.